निष्ठावंत कार्यकर्त्याची उपेक्षा

भिवंडी, ता.१८(वार्ताहर)ः ठाणे ग्रामीण जिल्हा काँग्रेस पक्षाच्या पदाधिकाऱ्यांची ब्लॉकनिहाय आढावा बैठक राजनोली येथे झाली. यावेळी काँग्रेस राष्ट्रीय सरचिटणीस यु.बी वेंकटेश यांच्यासमोरच निष्ठावंतांची उपेक्षा होत असल्याची नाराजी व्यक्त करण्यात आली.
ठाणे ग्रामीणमध्ये पक्ष संघटन मजबूत आहे. जिल्हा संघटनेने स्वबळावर लढण्याचा निर्णय घेतल्यास प्रदेश पक्ष संघटनेकडून त्याची नोंद घेतली जाईल असे स्पष्ट करताना निष्ठेने काम करणाऱ्याच्या पाठीशी पक्ष मजबुतीने उभा राहील, असा विश्वास काँग्रेस पक्षाचे कोकण प्रभारी यु.बी. वेंकटेश यांनी व्यक्त केला. सध्या देशात मोदी विरोधात गांधी यांची लढाई सुरू आहे. देश बनवण्याचे काम काँग्रेसने केले. पण भाजपाचे मोदी सरकार देश विकायला निघाला आहे. भाजपचे कुकर्म सांगत काँग्रेस कसा पर्याय राहू शकतो, याबाबत प्रत्येक कार्यकर्त्याने जनतेमध्ये जाऊन सांगण्याची गरज असल्याचे प्रतिपादन जिल्हा ग्रामीण प्रभारी राजेश शर्मा यांनी करताना केले. यावेळी प्रदेश सरचिटणीस ब्रिजकिशोर दत्त, महिला जिल्हाध्यक्ष जान्हवी देशमुख, अल्पसंख्याक जिल्हाध्यक्ष आसिफ शेख यासह भिवंडी, शहापूर, मुरबाड, कल्याण ग्रामीण, अंबरनाथ तालुका, अंबरनाथ शहर, बदलापूर शहर पदाधिकारी मोठ्या संख्येने उपस्थित होते.
-------------------------------------
चापलुसी करणाऱ्यांना दूर सारा
जिल्ह्यात काँग्रेस कार्यकर्ते निष्ठावंत आहेत. त्यांना पक्षाने पाठबळ देण्याची गरज आहे. पक्षात काम करणाऱ्यास पद मिळत नाही. त्यांच्या पाठीवर पक्षाने हात फिरवण्याची गरज आहे. प्रदेश कार्यालयात पाठीमागून येणाऱ्यांच्या पाठीवर हात ठेवण्याची पद्धत बंद केली पाहिजे. त्यामध्ये पक्षपात होत असल्याची नाराजी काँग्रेस जिल्हाध्यक्ष दयानंद चोरघे यांनी बोलून दाखविली. भिवंडी ग्रामीणमध्ये सहा महिने ब्लॉक अध्यक्ष नाही त्याकडे पक्ष नेतृत्वाने लक्ष देऊन सामान्य कार्यकर्त्यांचे म्हणणे ऐकण्याची गरज त्यांनी बोलून दाखवली.