नियमभंग केल्यामुळे बारविरोधात गुन्हा दाखल

उल्हासनगर, ता. १९ (वार्ताहर) : उल्हासनगरातील एका बारमध्ये महिलांविषयक नियमांचे उल्लंघन केल्याप्रकरणी कायदेशीर कारवाई करण्यात आली आहे. निर्धारित वेळेपेक्षा अधिक वेळ महिला वेटरना कामावर ठेवणाऱ्या हीरामोती बार अ‍ॅण्ड रेस्टॉरंटवर मध्यवर्ती पोलिस ठाण्यात गुन्हा दाखल करण्यात आला आहे.
कोणत्याही बारमध्ये महिला वेटरना रात्री ९.३० वाजेपर्यंतच कामावर ठेवण्याची परवानगी आहे, असे राज्य उत्पादन शुल्क विभाग, कल्याण-२ यांनी ९ मे रोजी आदेश जारी करत स्पष्ट केले होते. मात्र, राज्य उत्पादन शुल्क विभागाने जारी केलेल्या नियमावलीचे उल्लंघन करत निर्धारित वेळेनंतर महिला वेटरना कामावर ठेवणाऱ्या उल्हासनगर कॅम्प ३ येथील हीरामोती बार अ‍ॅण्ड रेस्टॉरंटवर रात्री १० वाजण्याच्या सुमारास मध्यवर्ती पोलिसांनी छापा टाकला. तपासादरम्यान बारचे व्यवस्थापक चंद्रशेखर परमेश्वर शेट्टी (वय ४८) यांनी आठ महिला वेटरना रात्री ९ वाजून ५० मिनिटांपर्यंत कामावर ठेवलेले आढळले. त्यामुळे शेट्टी यांच्याविरोधात संबंधित कायद्यानुसार गुन्हा दाखल करण्यात आला. या प्रकरणाचा तपास पोलिस उपनिरीक्षक राकेश शेवाले करत आहे. या पुढील चौकशीदरम्यान आणखी बारचालकांच्या नियम उल्लंघनाची माहिती समोर येण्याची शक्यता पोलिसांनी वर्तवली आहे.