चोरीला गेलेल्या दुचाकीचा शोध बेतला जीवावर

उल्हासनगर, ता. १९ (वार्ताहर) : माथेरानमध्ये फिरायला गेलेल्या एका पर्यटकाची दुचाकी चोरी गेल्याने पोलिस तक्रार केली होती; मात्र हीच तक्रार त्याच्या जीवावर बेतण्याची वेळ आली. उल्हासनगरच्या विठ्ठलवाडी परिसरात दुचाकी चोरट्याने साथीदारांसह धारदार शस्त्राने थेट प्राणघातक हल्ला केल्याची धक्कादायक घटना समोर आली आहे. हल्ल्यात इरफान चौधरी आणि त्याचा भाऊ गंभीर जखमी झाले असून, त्यांच्यावर मध्यवर्ती रुग्णालयात उपचार सुरू आहेत.
उल्हासनगर येथील रहिवासी असलेला मनसे कार्यकर्ता इरफान चौधरी आपल्या मित्रांसह दुचाकीने माथेरानला सहलीसाठी गेला होता. माथेरान फिरत असताना त्याची दुचाकी चोरी गेल्याचे निदर्शनास आले. त्यानंतर त्याने नेरळ पोलिस ठाण्यात तक्रार दाखल केली. तक्रार दिल्यानंतर पोलिसांनी त्याला सीसीटीव्ही फुटेज उपलब्ध करून दिले. त्याने तो व्हिडिओ आपल्या मित्रमंडळींमध्ये शेअर केला. याच दरम्यान सलमान नामक तरुणाने फुटेजमध्ये दिसणारा व्यक्ती ओळखीचा असल्याचे सांगून इरफानला त्याची भेट घडवून देतो, असे सांगितले. इरफान त्याचा भाऊ आणि मित्रांसह उल्हासनगरमधील विठ्ठलवाडी परिसरात सलमानसोबत गेला. जिथे दुचाकीचोरी इर्शाद आणि त्याचे सुमारे १०-१२ साथीदार आधीच थांबले होते. परिस्थिती बिघडताच इर्शाद आणि त्याच्या टोळीने धारदार शस्त्रांनी इरफान, त्याचा भाऊ आणि मित्रांवर अचानक हल्ला केला. या हल्ल्यात इरफान आणि त्याचा भाऊ गंभीर जखमी झाले. सध्या त्यांच्यावर मध्यवर्ती रुग्णालयात उपचार सुरू आहेत. मध्यवर्ती पोलिसांनी याप्रकरणी गुन्हा दाखल केला असून, हल्लेखोरांविरोधात तत्काळ कठोर कारवाई करावी, अशी मागणी इरफानने केली आहे. दरम्यान, मध्यवर्ती पोलिस ठाण्याचे पथक या प्रकरणाचा तपास करत असून, हल्लेखोरांचा शोध घेण्यासाठी विशेष पथक तयार करण्यात आल्याची माहिती मिळाली आहे.