महामार्गावरील अपघातप्रवण क्षेत्रांकडे दुर्लक्ष

खालापूर, ता. १९ (बातमीदार) ः तालुक्यातील रस्त्याचे जाळे विस्तारत असताना मुंबई-पुणे महामार्गावरील सुरक्षिततेकडे दुर्लक्ष होत आहे. दोन महानगरांना जोडणारा मुंबई-पुणे राष्ट्रीय महामार्ग खालापूर हद्दीतून जातो. रस्त्याचे दुपदरीकरण झाले असले तरी धोकादायक वळणे, अपुऱ्या मार्गिका, सेवा रस्‍ता नसणे, छोट्या मोऱ्यांची कामे प्रलंबित आहेत. यामुळे अपघातांचे प्रमाण वाढले असून रस्‍त्‍याच्या देखभाल-दुरुस्‍तीकडे लक्ष देण्याची मागणी प्रवासी तसेच वाहनचालकांकडून होत आहे.
मुंबई-पुणे महामार्गाला अनधिकृत बांधकामाचा विळखा पडला आहे. चौक फाटा, लोधिवली, चौक डाक बंगला, हाळ याठिकाणी धोकादायक लेनकटिंग आहे. वावंढळ गावानजीक पनवेलकडे जाताना असलेल्या पुलावर आतापर्यंत अनेक अपघात झाले आहेत. तीन महिन्यांत या पट्ट्यात दहापेक्षा अधिक अपघात घडले असून तिघांना जीव गमवावा लागला आहे, तर दहा जण जखमी झाले आहेत. अपघात घडलेल्या ठिकाणी तात्पुरत्या स्वरूपात ठेकेदाराकडून डागडुजी, दुरुस्ती केली जाते; परंतु अपघात टाळण्यासाठी विशेष उपाययोजना होताना दिसत नाहीत.
सामाजिक कार्यकर्ते श्याम साळवी यांनी, महाराष्ट्र राज्य रस्ते विकास महामंडळ आणि आयआरबीकडे प्रवाशांच्या सुरक्षिततेच्या दृष्टीने उपाययोजना करण्याबाबत पाठपुरावा सुरू ठेवला आहे. प्रवाशांकडून टोलवसुली होत असल्याने संबंधित यंत्रणेने रस्‍त्‍यांच्या डागडुजीकडे लक्ष देणे गरजेचे असल्‍याची मागणी त्‍यांनी पत्राद्वारे केली आहे.

महामार्गावर सूचनाफलक
जुन्या मुंबई-पुणे महामार्गावर प्रवाशांच्या सुरक्षेच्या दृष्टीने उपाययोजना करण्यात येत असून रम्बलिंग स्ट्रिप्स, सूचनाफलक बसवण्यात आले आहेत. शिवाय, महामार्गालगत अतिक्रमणधारकांना नोटीसदेखील पाठवण्यात आल्याची माहिती आयआरबीकडून देण्यात आली.

खालापूर ः डाक बंगला परिसरात तीव्र उतार अपघातास कारणीभूत ठरत आहे.