मद्यधुंद पर्यटकावर पोलिसांचा वचक

वाशी, ता. १९ (बातमीदार) : सध्या पावसाने नवी मुंबईसह पनवेल, उरण परिसरात जोर धरला आहे. त्यामुळे पावसाळी दिवसांमध्ये निसर्गाचा मनमुराद आनंद लुटण्यासाठी पर्यटनस्थळी पर्यटकांची गर्दी होताना दिसत आहे; मात्र या सर्व पर्यटनस्थळांवर पोलिसांचा कडा पहारा असणार आहे. मद्यधुंद पर्यटक पोलिसांच्या रडारवर असून त्यांच्यावर कारवाई केली जाणार आहे; तर काही ठिकाणांवर सुरक्षेच्या दृष्टीने बंदी घालण्यात आली आहे.
नवी मुंबईतील घणसोली येथील गवळीदेव पर्यटनस्थळाचा विकास करण्यात येत असल्यामुळे या ठिकाणी पर्यटकांना बंदी घालण्यात आली आहे. त्यामुळे पर्यटकांचा मोर्चा नवी मुंबईतील सुलाई देवी येथील निसर्गरम्य ठिकाणी व इलठण पाडा येथील ब्रिटिशकालीन धरणाच्या ठिकाणी वळला आहे. त्यामुळे तेथे निर्सगाच्या सानिध्यात मौज करण्यासाठी पर्यटकांची गर्दी होण्यास सुरुवात होऊ लागली आहे. इलठण पाडा येथील ब्रिटिशकालीन धरण परिसरात पर्यटनाचा आनंद लुटण्यासाठी येणाऱ्यांमध्ये काही अतिउत्साही पर्यटकही असतात. त्यांच्याकडून करण्यात येणाऱ्या हुल्लडबाजीला प्रतिबंध घालण्याच्या दृष्टीने स्थानिक पोलिसांनाही सध्या विशेष खबरदारी घेण्यास सुरुवात केली आहे. पर्यटनाच्या ठिकाणी मद्यप्राशन केल्यास त्यांच्याविरोधात कायदेशीर कारवाई करण्यात येईल, असेदेखील स्पष्ट केले आहे.
----------------
सेल्फी काढताना काळजी घ्या!
पाण्याच्या ठिकाणी सेल्फी काढताना कोणतीही दुर्घटना घडणार नाही, याची दक्षता घ्यावी, असे आवाहन पोलिसांच्या वतीने पर्यटकांना करण्यात येत आहे. इलठण पाडा येथील बिटिशकालीन धरणामध्ये उतरण्यास सक्त मनाई असून सुट्टीच्या दिवशी पोलिस बंदोबस्त तैनात करण्यात येणार असल्याचे पोलिसांनी स्पष्ट केले.
----------------
गवळी देव परिसरात काम सुरू असल्यामुळे पर्यटकांसाठी प्रवेशबंदी आहे. त्या ठिकाणी कोणी गेल्यास त्यांच्यावर कारवाई करण्यात येईल. सुलाईदेवी डोंगर परिसर व इलठण पाडा येथील ब्रिटिशकालीन धरणाच्या ठिकाणी मद्यप्राशन केल्यास, तसेच सार्वजनिक ठिकाणी गैरवर्तन केल्यास त्यांच्यावर कडक कारवाई करण्यात येणार आहे.
- सुनील वाघमारे, वरिष्ठ पोलिस निरीक्षक, रबाळे एमआयडीसी