डोंगरातील नागरिकांना एनडीआरएफ दलाकडून प्रात्यक्षिक

डोंगरातील नागरिकांना एनडीआरएफ दलाकडून प्रात्यक्षिक
भूस्खलन झाल्यानंतर काय करायचे यावर मार्गदर्शन
घाटकोपर, ता. १९ (बातमीदार) ः पावसाळ्यात डोंगरभागात दरड कोसळणे, मातीचे भूस्खलन होण्याच्या घटना घडत असतात. गेल्या तीन ते चार वर्षांत अशा घटनांमध्ये वाढ झाली आहे. त्‍यामुळे एनडीआरएफ दलाकडून घाटकोपरवासीयांना मार्गदर्शन करण्यात येणार आहे. १९ जून ते ११ जुलैपर्यंत धोकादायक ठिकाणी राहणाऱ्या नागरिकांना आपत्तीदरम्यान स्वतःची सुरक्षा कशी करावी, याची प्रात्यक्षिके दाखवण्यात येणार असल्याचे एन वाॅर्डचे कनिष्ठ अभियंता विलास जाधव यांनी सांगितले.
घाटकोपर पश्चिम हा संपूर्ण डोंगराळ भाग असून खंडोबा टेकडी, पार्क साइट, राहुलनगर, वर्षानगर हा संपूर्ण टेकडीचा परिसर असून दरवर्षी येथे पावसाळ्यात दरडीचा धोका संभवत असतो. डोंगर भागात राहणाऱ्या नागरिकांना आपत्तीदरम्यान स्वतःचा जीव कसा वाचवायचा, तसेच इतरांना कसे वाचवावे, याचे एनडीआरएफ दलाच्या जवानांनी नागरिकांना प्रात्यक्षिक दाखवत मार्गदर्शन केले.
उपआयुक्त संजय कुमार धोंडे, एन वाॅर्ड विभागाचे सहाय्यक आयुक्त गजानन बेल्लाळे यांच्या मार्गदर्शनाखाली सहाय्यक अभियंते विशाल म्हैसकर, कनिष्ठ अभियंता विलास जाधव, संतोष जाधव यांच्या देखरेखीतून एनडीआरएफचे निरीक्षक धर्मेंद्र सेवला यांच्यासह त्यांच्या आठ जणांच्या टीमने राहुलनगर येथील सहारा सोसायटीतील नागरिकांना मार्गदर्शन केले.