दीपक पाठकच्या घरी खासदार भेट कधी देणार?

बदलापूर, ता. १९ (बातमीदार) : अहमदाबाद येथील विमान दुर्घटनेला आठवडा उलटून गेला तरी, मृत्यू झालेल्या बदलापुरातील रहिवासी दीपक पाठक याच्या कुटुंबीयांचे सांत्वन करायला आणि त्यांच्या मदतीसाठी विचारपूस करायला खासदार सुरेश म्हात्रे अजून गेलेच नाही. खासदारांनी आपल्या संवेदना हरपल्या का? असा सवाल उपस्थित करत बदलापूरकरांनी त्या‍वर नाराजी व्यक्त केली आहे.
अहमदाबाद येथील विमान दुर्घटनेत २४२ प्रवाशांपैकी २४१ प्रवाशांचा मृत्यू झाला. या मृतांमध्ये बदलापूर पूर्व कात्रप परिसरात राहणाऱ्या एअर इंडियाच्या विमानात क्रू मेंबर असलेल्या ३४ वर्षीय दीपक पाठक याचा समावेश होता. त्याच्या पश्चात त्याचे आई-वडील, पत्नी, दोन विवाहित बहिणी असा परिवार आहे. या घटनेला आठवडा उलटला तरीही, दीपकचा मृतदेह त्याच्या नातेवाइकांच्या ताब्यात मिळालेला नाही. मृतदेह ताब्यात घेण्यासाठी संपूर्ण डीएनए चाचणी आणि इतर वैद्यकीय चाचण्या करून घेण्यासाठी दीपकच्या बहिणी आठवडाभरापासून गुजरातमध्ये आहेत. आई-वडील आणि त्याच्या कुटुंबीयांना दु:खातून बाहेर काढण्यासाठी नातलग, मित्रपरिवारांसह अनेकांनी भेट दिली. मात्र, भिवंडी लोकसभा मतदारसंघाचे खासदार सुरेश म्हात्रे यांनी अद्याप त्यांच्या सांत्वनासाठी गेलेच नाही. मतदारसंघात अनेक कार्यक्रमांना आवर्जून हजेरी लावणारे खासदार पाठक यांच्या घरी सांत्वन द्यायला भेट देणार का? असा प्रश्नही बदलापूरकर विचारत आहेत.

पाठक कुटुंबाला भेट देण्यास गेलो नाही; पण दीपकचा मृतदेह लवकर ताब्यात मिळावा, यासाठी नागरी उड्डाणमंत्री व खासदार सुप्रिया सुळे यांना संपर्क केला आहे. या कुटुंबाला मदत करण्यासाठी प्रयत्न करत आहे. उद्या संध्याकाळी मी पाठक कुटुंबाला भेटण्यासाठी बदलापुरात येत आहे.
- सुरेश म्हात्रे, खासदार
भिवंडी लोकसभा मतदारसंघ