पालिका रुग्णालयातील सूश्रुषाबद्दल आमदारांचे कौतुक

पालिका रुग्णालयातील शुश्रूषेबद्दल आमदारांचे कौतुक
वाशीत सदाभाऊ खोत यांच्या पोटदुखीवर यशस्‍वी उपचार
सकाळ वृत्तसेवा
नवी मुंबई, ता. १९ ः राज्याचे माजी मंत्री आणि आमदार सदाभाऊ खोत यांनी नवी मुंबई महापालिकेच्या रुग्णालयात उपचार घेतले. विशेष म्हणजे, या रुग्णालयातील डॉक्टर आणि कर्मचाऱ्यांनी केलेल्या चांगल्या सेवेबद्दल सदाभाऊंनी त्यांचे कौतुक केले. समाजमाध्यमावर एक पोस्ट लिहीत सदाभाऊ खोत यांनी शासकीय सेवेबद्दल आलेले सकारात्मक अनुभव विशद केले. सदाभाऊ यांनी खासगी रुग्णालयात न जाता महापालिकेच्या रुग्णालयात जाऊन उपचार करून घेतल्याने इतर लोकप्रतिनिधी आणि सनदी अधिकाऱ्यांपुढे नवा आदर्श ठेवला आहे.
१८ जूनला रात्री अचानक सदाभाऊंच्या पोटात दुखायला लागले. पोटात इन्फेक्शन झाल्याने प्रचंड अशक्तपणा आला. त्यामुळे सदाभाऊ नवी मुंबईतील महापालिकेच्या वाशी येथील सामान्य रुग्णालयात उपचारासाठी दाखल झाले. सदाभाऊ रुग्णालयात दाखल झाल्यानंतर कर्तव्यावर असलेल्या डॉक्टरांनी त्‍यांची नीट चौकशी आणि विचारपूस केल्यानंतर त्यांच्यावर उपचार केले. या उपचारानंतर बरे वाटल्याने सदाभाऊंना सोडण्यात आले; मात्र काही तासांमध्ये सदाभाऊंना नवी मुंबई महापालिकेच्या रुग्णालयातील डॉक्टर आणि कर्मचाऱ्यांकडून मिळालेल्या आपुलकीच्या सेवेबद्दल त्यांचा खासगीऐवजी सरकारी रुग्णालयात जाऊन उपचार घेण्याचा निर्णय योग्य ठरला, असे खुद्द सदाभाऊ यांनी स्वतःच्या पोस्टमध्ये स्पष्ट केले आहे. खऱ्या अर्थाने, शासनाच्या आरोग्य सेवांचा लाभ सर्वसामान्य जनतेपर्यंत पोहोचतो आहे आणि तो योग्य प्रकारे घेतला जातो हे प्रत्यक्ष पाहून समाधान वाटले, असे सदाभाऊ खोत यांनी स्पष्ट केले. नवी मुंबई महापालिकेचे रुग्णालय हे सर्वसामान्यांसाठी हा एक दिलासा देणारा अनुभव आहे. अनेक वेळा आपण सरकारी यंत्रणांवर अविश्वास ठेवतो; पण हे रुग्णालय त्याच अविश्वासावर विश्वासाने शिक्कामोर्तब करणारे ठरले, असे कौतुकोद्गार सदाभाऊ खोत यांनी काढले आहेत.
------------------------------------------
पोस्‍टमध्ये केले कौतुक
सदाभाऊ यांनी पोस्टमध्ये रुग्णालयातील उपचाराबद्दल सांगितले, की रुग्णालयातील डॉक्टर अतिशय तत्परतेने तपासणी करीत होते. रुग्णालयात सर्व औषधे व सुविधा उपलब्ध होत्या. रुग्णालयातील कर्मचारी अतिशय शिस्तबद्ध असून रुग्णालयात अनेक सर्वसामान्य नागरिक येत असून डॉक्टर त्यांच्याशी तितक्याच संवेदनशीलतेने, आपलेपणाने वागत असल्याच्या बाबीचा पोस्टमध्ये आवर्जून उल्लेख केला आहे. डॉक्टर, कर्मचाऱ्यांनी केलेल्या सेवेत प्रामाणिकपणा स्पष्ट जाणवत असल्याचे कौतुक सदाभाऊंनी केले.
...................
गावी असतो, तेव्हासुद्धा शासकीय रुग्णालयात माझा उपचार घेण्यावर भर असतो. सर्वसामान्यांकरिता शासनाने लागू केलेल्या योजनांची अंमलबजावणी होते की नाही, डॉक्टर आणि परिचारिका उपलब्ध आहेत की नाही. रुग्णांना चांगल्या सेवा मिळतात की नाही, हे या निमित्ताने प्रत्यक्षात पाहता येते.
- सदाभाऊ खोत, आमदार