पालघर जिल्ह्यात अतिवृष्टीचा इशारा

कासा, ता. १९ (बातमीदार) : भारतीय हवामान विभागाने पालघर जिल्ह्यासाठी अतिदक्षतेचा इशारा जारी केला आहे. काही ठिकाणी अत्यंत मुसळधार पावसाची (२०४ मिमीपेक्षा अधिक) शक्यता वर्तवली आहे. इतर भागांमध्येही मध्यम ते जोरदार पावसाचा इशारा देण्यात आला आहे. या पार्श्वभूमीवर नागरिकांना सुरक्षित राहण्याचे आणि घराबाहेर पडणे टाळण्याचे आवाहन प्रशासनाकडून करण्यात आले आहे.

पालघर जिल्ह्यातील डोंगराळ व सखल भागांमध्ये जमीन धसण्याचा धोका निर्माण होऊ शकतो. या पार्श्वभूमीवर जिल्हा आपत्ती व्यवस्थापन यंत्रणा सतर्क झाली असून, नागरिकांनी आवश्यक ती काळजी घ्यावी, असे आवाहन करण्यात आले आहे.

हवामान विभागाच्या अंदाजानुसार, २० ते २३ जूनदरम्यान पालघर जिल्ह्यात पावसाचा जोर कायम राहणार आहे. काही ठिकाणी जोरदार पाऊस, तर बहुतांश भागात मध्यम स्वरूपात पावसाची शक्यता आहे. त्यामुळे या काळात पूरजन्य परिस्थिती, वीज कोसळणे किंवा वाऱ्याच्या झंझावाताची शक्यता नाकारता येत नाही.

प्रशासन सज्ज
डोंगराळ भागातील नागरिकांनी दरड कोसळण्याच्या धोक्यामुळे विशेष सतर्क राहावे. विजेच्या तारांपासून दूर राहावे आणि विजेच्या आवाजानंतर सुरक्षित स्थळी आसरा घ्यावा. जिल्हा प्रशासन, महसूल विभाग, कृषी विभाग, आपत्ती व्यवस्थापन पथक, तसेच पोलिस व आरोग्य यंत्रणा अलर्टवर असून, नागरिकांनी त्यांच्या सूचनांचे पालन करावे, असे आवाहन करण्यात आले आहे.