अनधिकृत बांधकामांवर हातोडा

अनधिकृत बांधकामांवर हातोडा
वीज, नळजोडणी तोडणार
सकाळ वृत्तसेवा
ठाणे, ता. १९ : पालिका क्षेत्रातील अनधिकृत बांधकामांबाबत पालिका प्रशासनाला टीकेचे धनी व्हावे लागत आहे. अशातच काही दिवसांपूर्वी न्यायालयाच्या आदेशाने मुंब्रा-शिळ येथील त्या १७ अनधिकृत इमारतींवर पालिका आयुक्तांच्या उपस्थितीत कारवाई करण्यात आली होती. त्यानंतर आता पालिका प्रशासनाने नऊ प्रभाग समितीअंतर्गत नऊ पथके तयार केली असून, त्या त्या भागातील अनधिकृत इमारतींवर कारवाईचा धडाका सुरू केला आहे, अशी माहिती महापालिकेच्या अतिक्रमण नियंत्रण विभागाने दिली आहे. तसेच ज्या इमारतींमध्ये रहिवाशांचे वास्तव्य असेल त्या इमारतींचे वीज, पाणी बंद करण्यात येणार आहे, अशी माहितीही देण्यात आली आहे.

काही दिवसांपूर्वी मुंब्रा-शिळ येथील १७ इमारतींवर कारवाई करण्याचे आदेश उच्च न्यायालयाने दिले. त्यानंतर पालिका आयुक्तांच्या उपस्थितीत कारवाई करण्यात आली. १७ पैकी आतापर्यंत १२ इमारतींवर कारवाई केली आहे. तर पाच इमारतधारकांना न्यायालयाच्या आदेशानुसार २३ जूनपर्यंत इमारत खाली करण्याचे आदेश दिले आहेत. न्यायालयाच्या निर्देशानुसार पुढील दिशा ठरविली जाईल, असे महापालिकेने स्पष्ट केले आहे. अशातच बुधवारी (ता. १८) पालिका आयुक्तांनी बैठक घेत मुंब्रा, शिळ भागासह इतर प्रभाग समितीदेखील अनधिकृत इमारती असल्याचा मुद्दा उपस्थित झाला. त्या वेळी सर्वच प्रभाग समित्यांतील अनधिकृत बांधकामांवर तत्काळ कारवाई करण्याचे आदेश आयुक्तांनी संबंधित प्रभाग समितींना दिले होते. त्यानंतर आता प्रत्येक प्रभाग समितीत नऊ जणांचे पथक तयार केले आहे. त्यांच्यामार्फत कारवाई हाती घेण्यात आली आहे. गुरवारी (ता. १९) एकाच वेळी माजिवडा, मानपाडा, वर्तकनगर, कळवा, नौपाडा, उथळसर आदी भागांत कारवाईचा धडका सुरू केला आहे.

इमारतधारकांना नोटीस
पहिल्या टप्प्यात ज्या ठिकाणी इमारतींचे काम नव्याने सुरू आहे, त्या बांधकामांवर कारवाई केली जाणार आहे. त्यानंतर ज्या इमारती व्याप्त नाहीत, अशा इमारतींवर कारवाई करण्यात येणार आहे. तिसऱ्या टप्प्यात ज्या इमारती व्याप्त असतील अशा इमारतधारकांना नोटीस बजावून इमारती रिकाम्या केल्या जाणार आहेत. त्यानंतर त्यावरदेखील कारवाई केली जाणार आहे, माहिती अतिक्रमण नियंत्रण विभागाचे उपायुक्त शंकर पाटोळे यांनी दिली.