कोपरखैरणे १५ तास अंधारात

तुर्भे, ता. १९ (बातमीदार) : नवी मुंबईतील सर्वच नोडमध्ये विजेचा खेळखंडोबा सुरू आहे. कोपरखैरणे भागात बुधवारी (ता. १८) रात्री साडेबारा वाजल्यापासून वीजपुरवठा खंडित झाला होता. अखेर दुसऱ्या दिवशी गुरुवारी १५ तासांनी वीजपुरवठा पूर्ववत करण्यात आला.
कोपरखैरणे सेक्टर २०मध्ये बुधवारी रात्री साडेबारा वाजता खंडित झालेला वीजपुरवठा गुरुवारी दुपारी साडेतीन वाजता सुरळीत झाला. त्यामुळे नागरिकांना प्रचंड उकाडा सहन करावा लागला. त्यातच रात्रभर सुरू असणाऱ्या पावसामुळे नागरिकांना संपूर्ण रात्र अंधारात काढावी लागली. वीज नसल्यामुळे नळाला पाणीसुद्धा आले नाही. त्यामुळे एकीकडे पाणीबाणी आणि दुसरीकडे बत्ती गुल अशा दुहेरी चक्रात पूर्ण रात्र आणि दुपार गेली.
वीजपुरवठा खंडित होताच नागरिकांनी महावितरण कार्यालयाशी दूरध्वनीवरून संपर्क साधण्याचा प्रयत्न केला; मात्र कोणताही प्रतिसाद न मिळाल्याने नागरिकांना संपूर्ण रात्र अंधारात काढावी लागली. त्यानंतर सकाळी तक्रार देण्यात आली. केबल दुरुस्तीचे काम हाती घेतल्यानंतर दुपारी साडेतीन वाजता वीजपुरवठा सुरळीत करण्यात आला.