योग दिनानिमित्त पर्यावरणीय उपक्रम

पालघर, ता. १९ (बातमीदार) : जिल्हा परिषदेच्या जल जीवन मिशन आणि स्वच्छ भारत अभियानतर्फे २१ जूनच्या ११व्या आंतरराष्ट्रीय योगदिनानिमित्त सर्व ग्रामपंचायतींमध्ये ग्राम आरोग्य पोषण पाणीपुरवठा व स्वच्छता समिती यांच्या सहकार्याने योगसत्रांबरोबरच वृक्षारोपण, स्वच्छता मोहीम व नागरिकांच्या पुढाकारातून पर्यावरणीय उपक्रम राबविण्यात येणार असल्याची माहिती पालघर जिल्हा परिषदेचे मुख्य कार्यकारी अधिकारी मनोज रानडे यांनी दिली.

यंदाचा आंतरराष्ट्रीय योगदिन २१ जून रोजी एक दशक पूर्ण करीत आहे. यानिमित्ताने देशात विशेष उपक्रम राबविण्यात येणार आहेत. हे उपक्रम १० विशेष कार्यक्रमांमध्ये विभागले आहेत. मुख्य आंतरराष्ट्रीय योगदिनाचा कार्यक्रम पंतप्रधान मोदी यांच्या उपस्थितीत विशाखापट्टणम, आंध्र प्रदेश येथून राष्ट्रीय कार्यक्रमाशी समांतरपणे होणार आहे.

योग संगम हे व्यापक जनसहभाग आणि मोठ्या प्रमाणावर योग प्रात्यक्षिकांची परंपरा पुढे नेण्यासाठी आयोजित करण्यात आले आहे. योगदिनाच्या कार्यक्रमांतर्गत योगसत्रांबरोबरच वृक्षारोपण, स्वच्छता मोहीम व समुदायाच्या पुढाकारातून राबविण्यात येणाऱ्या पर्यावरणीय उपक्रमांचा समावेश केला जाणार आहे. हा कार्यक्रम ग्रामपंचायतीने आयोजित करायचा आहे, अशी माहिती उपमुख्य कार्यकारी अधिकारी (पाणी व स्वच्छता) अतुल पारसकर यांनी दिली आहे.