कामवारी नदी पात्रातील जलपर्णी काढण्यास सुरवात

सकाळ इम्पॅक्ट
कामवारी नदीपात्रातील जलपर्णी काढण्यास सुरुवात
भिवंडी प्रशासनाला आली जाग
भिवंडी, ता. २० (वार्ताहर) : कामवारी नदीपात्राला जलपर्णींचा विळखा बसला होता. त्यामुळे भिवंडी शहर व ग्रामीण भागातील नदीलगतच्या क्षेत्रात पूरसदृश्य परिस्थितीची भीती निर्माण झाली. याबाबतचे वृत्त ‘सकाळ’मध्ये ‘कामवारीतील जलपर्णीमुळे पुराचा धोका’, या मथळ्याखाली शुक्रवारी (ता. २०) प्रकाशित करण्यात आले. यानंतर पालिका प्रशासनास जाग आली. पालिका प्रशासनाने शुक्रवारीच तातडीने पोकलेनच्या सहाय्याने या नदीपात्रातील जलपर्णी काढण्यास सुरुवात केली आहे. त्यामुळे येथील जलप्रवाह सुरळीत सुरू होण्यास मदत होत आहे.
भिवंडी शहर आणि ग्रामीण भागाच्या सीमेवरून वाहणाऱ्या कामवारी नदीपात्राला जलपर्णीचा विळखा पडला होता. मागील दोन दिवसांपासून सुरू असलेल्या पावसामुळे नदीपात्रात पाणी पातळी वाढली असताना नदीपात्रातील जलपर्णी नदीनाका येथे पुलाखाली अडकून पडली होती. यामुळे शहर आणि ग्रामीण भागातील नदीलगत पुराचा धोका निर्माण झाल्याने नागरिकांमध्ये भीतीचे वातावरण होते.