अंबरनाथ रिक्षा चालकांचा पालिकेत ठिय्या

रिक्षाचालकांचा पालिकेत ठिय्या
अंबरनाथमधील रस्ते सुधारणा न झाल्यास आंदोलनाचा इशारा
अंबरनाथ, ता. २० (बातमीदार) : अंबरनाथ शहरातील उखडलेले आणि विविध कामांसाठी खोदलेले रस्ते त्वरित दुरुस्त करावे, या मागणीसाठी रिक्षाचालकांनी शुक्रवारी (ता. २०) नगरपालिका मुख्यालयासमोर ठिय्या आंदोलन केले. या वेळी रिक्षाचालकांनी नगरपालिकेच्या अधिकाऱ्यांच्या विरोधात संताप व्यक्त करीत सुधारणा न झाल्यास तीव्र आंदोलनाचा इशारा दिला आहे.
अंबरनाथ पूर्व आणि पश्चिमेकडील नादुरुस्त रस्ते तसेच रिक्षाचालकांना भेडसावणाऱ्या समस्या दूर करण्याची मागणी करूनही नगरपालिका प्रशासन दुर्लक्ष करीत आहे. या कारणावरून जोशी काका आणि रामदास पाटील रिक्षाचालक-मालक संघटनेच्या वतीने अध्यक्ष मिलिंद पाटील यांच्या नेतृत्वात शुक्रवारी नगरपालिका कार्यालयावर धडक देऊन निषेध व्यक्त करण्यात आला. संघटनेचे पदाधिकारी कुमार मुदलियार यांच्यासह रिक्षाचालक-मालक मोठ्या संख्येने उपस्थित होते.
शहरातील रस्ते दुरुस्ती, रिक्षा स्टँड तसेच रेल्वेस्थानक परिसरातील समस्यांबाबत पालिका प्रशासनाचे लक्ष वेधून घेण्यासाठी रिक्षाचालकांनी काही काळ नगरपालिका मुख्यालयामध्ये ठिय्या देत आंदोलन केले.
दरम्यान, शहरात विविध कामांसाठी खोदण्यात आलेल्या रस्त्यावरील खड्डे बुजवण्याबाबत एकत्रित प्रस्ताव सरकारकडे पाठवण्यात आला आहे. तोपर्यंत २१ जूनपासून तात्पुरत्या स्वरूपात खड्डे बुजवण्याचे काम हाती घेण्यात येईल. झाडांच्या फांद्या आणि इतर कामे सुरू करण्यात येतील, तसेच अनधिकृत फेरीवाल्यांवरील कारवाईसाठी अतिक्रमण विभागाच्या कर्मचाऱ्यांची नियुक्ती करण्यात आल्याचे लेखी आश्वासन पालिका प्रशासनाच्या वतीने दिल्यानंतर आंदोलन मागे घेण्यात आले.