दिवसा आंदोलन, रात्री दारूविक्री

खारघर, ता. २१ (बातमीदार) : खारघर सेक्टर ६मध्ये नव्याने सुरू झालेल्या वाइन शॉपच्या विरोधात संतापलेल्या नागरिकांनी गोल्डन कॉइन वाइन मार्ट या दुकानासमोरील फलकाची तोडफोड केली. त्यानंतर पनवेल महापालिकेने दुकानासमोरील अनधिकृत शेड जेसीबीच्या मदतीने जमीनदोस्त केले. आंदोलनानंतर दारूचे दुकान बंद होईल, असे रहिवाशांना वाटत होते; मात्र दिवसा आंदोलनही करून रात्री दारूचे दुकान सुरू असल्यामुळे नागरिकांनी नाराजी व्यक्त केली.
खारघर सेक्टर ६मधील शहा आर्केड इमारतीच्या दुकान गाळ्यात सोसायटी तसेच पोलिस आणि पालिकेची परवानगी न घेता गोल्डन कॉइन वाइन मार्ट या नावाने वाइन शॉप सुरू झाल्यामुळे रहिवाशांमध्ये संतापाचे वातावरण पसरले आहे. त्यानंतर शुक्रवारी (ता. २०) रहिवाशांनी आंदोलन करून दुकानासमोरील फलकांची तोडफोड केली. दुकानासमोर उभारलेले अनधिकृत शेड पालिकेने जेसीबीच्या साह्याने जमीनदोस्त केले. दरम्यान, स्थानिक प्रशासनाची परवानगी नसताना सुरू झालेले वाइन शॉप बंद करण्यात यावे, यासाठी पावसाळी अधिवेशनात आवाज उठविला जाईल. पुढील आठवड्यात संघर्ष समितीच्या पदाधिकाऱ्यांसमवेत उपमुख्यमंत्री अजित पवार, राज्य उत्पादन शुल्क विभागाचे आयुक्त यांची भेट घेऊन वाइन शॉप बंद करण्यासाठी प्रयत्न केले जातील, असे आमदार प्रशांत ठाकूर यांनी सांगितले. या वेळी आमदार विक्रांत पाटील, माजी आमदार बाळाराम पाटील, काँग्रेसचे सुदाम पाटील यांनीसुद्धा आम्ही जनतेसोबत असून दारू दुकान बंद झालेच पाहिजे, असे सांगितले. शुक्रवारी दारू दुकानाच्या विरोधात रहिवाशांनी तीव्र आंदोलन छेडल्यामुळे दारूचे दुकान बंद होईल, असे रहिवाशांना वाटत होते. दरम्यान, त्याच रात्री नेहमीप्रमाणे दुकान खुले केल्यामुळे नागरिकांनी नाराजी व्यक्त केली.
--------------------
आम्ही सर्व कायदेशीर प्रक्रिया पार पाडून आमचा व्यवसाय सुरू केला आहे. खारघर शहरात इतर ठिकाणी बेकायदा दारूविक्री करून सरकारचा महसूल बुडवित आहेत, त्यांच्यावर कारवाई होणे अपेक्षित आहे.
- अनिल मंचुडिया, व्यवस्थापक, गोल्ड कॉइन वाइन मार्ट