कोरावळे शाळेत शैक्षणिक उपक्रम

मुरबाड, ता. २२ (वार्ताहर) : तालुक्यातील कोरावळे येथे जिल्हा परिषद शाळेत गुरुवारी (ता. १८) शैक्षणिक उपक्रम पार पडला. या वेळी सातवी व आठवीच्या ६५ विद्यार्थ्यांना ‘पेपरट्रॉनिक किट’चे वाटप करण्यात आले. हा अभिनव उपक्रम अगस्त्य इंटरनॅशनल फाउंडेशन आणि सोसायटी जनरल सिक्युरिटीज सर्व्हिसेस यांच्या संयुक्त विद्यमाने राबवण्यात आला. शाळेचे मुख्याध्यापक मंगळदास कंटे आणि इतर शिक्षकांच्या उपस्थितीत हे किट देण्यात आले. या वेळी त्यातील साहित्याची माहिती या संस्थेच्या स्वयंसेविका रिंकू पडवळ व तेजस्विनी माळी यांनी विद्यार्थ्यांना दिली. विशेष म्हणजे, मुलांकडून एक प्रात्यक्षिकही करून घेण्यात आले. ‘पेपरट्रॉनिक किट’मुळे मुलांना विज्ञानातील संकल्पना अधिक सोप्या आणि मनोरंजक पद्धतीने समजण्यास मदत होईल, यामुळे त्यांची वैज्ञानिक जिज्ञासा वाढणार आहे.