महमंद अली चौक रस्त्याला कोंडीचे ग्रहण

महम्मद अली चौक रस्त्याला कोंडीचे ग्रहण
दोन रुग्णवाहिकांना वाहतूक कोंडीचा फटका
कल्याण, ता. २१ (वार्ताहर) ः पश्चिमेतील महम्मद अल्ली चौक ते छत्रपती शिवाजी महाराज चौक रस्त्याला वाहतूक कोंडीचे ग्रहण लागले असून, रुग्णवाहिकेला याचा फटका बसत आहे. या रस्त्यावरील वाहतूक कोंडीचे ग्रहण प्रशासकीय यंत्रणा कसे सोडविणार, असा सवाल उपस्थित होत आहे.
कल्याण पश्चिमेतील महम्मद अली चौक ते छत्रपती शिवाजी महाराज चौक हा बाजार पेठ रस्ता असून, स्टेशननजीक कल्याण डोंबिवली महापालिका मुख्यालयात पोचण्यासाठी नागरिकांना द्रविडी प्राणायाम करावा लागत आहे. रस्त्यावरील बेशिस्त पार्किंग, पदपथालगत असलेल्या अनधिकृत हातगाड्या, फेरीवाले तसेच बेशिस्त वाहनचालक यामुळे वाहतूक कोंडी मोठ्या प्रमाणावर होते. याच रस्त्यापासून हाकेच्या अंतरावर वाहतूक शाखा कार्यालय आणि केडीएमसी मुख्यालय असून, दोन्ही यंत्रणांनादेखील वाहतूक कोंडीवर आवार घालता येत नसल्याचे चित्र दिसून येत आहे.

रुग्णवाहिकेला कोंडीचा फटका
शुक्रवारी (ता. २०) दुपारी सव्वादोनच्या सुमारास महम्मद अली ते छत्रपती शिवाजी महाराज चौक रस्त्यादरम्यान दोन रुग्णवाहिकेला वाहतूक कोंडीचा फटका बसला. रुग्णवाहिकेचा सायरन आवाज ऐकूनदेखील १० मिनिटे त्यांना वाहतूक कोंडीत अडकून राहावे लागले. याचा रुग्णांच्या जीवाला धोक उद्भवण्याची भीती आहे.

दिवसाआड पार्किंग
केडीएमसी ‘क’ प्रभाग क्षेत्र सहाय्यक आयुक्त धनंजय थोरात यांच्याशी संपर्क साधला असता त्यांनी सांगितले, की फेरीवाला हटाव मोहीम सुरूच असून, रस्त्यालगत दुचाकी पार्किंगबाबत वाहतूक विभागाची बैठक झाली आहे. यादरम्यान रस्त्यालगत दिवसाआड पार्किंग करण्याचे नियोजन असून, बाजारपेठेमधील दुकानदाराच्या दुचाकीसाठी मनपा वाहनतळ येथे पार्किंग व्यवस्था सवलतीच्या दरात उपलब्ध होणार आहे.