ऑनलाइन मटका अड्ड्यावर भिवंडी गुन्हे शाखेचा छापा

उल्हासनगर, ता. २१ (वार्ताहर) : उल्हासनगरमधील नेताजी चौकातील साई आर्केड इमारतीमध्ये ऑनलाइन मटक्याचा अड्डा सुरू असल्याची माहिती भिवंडी गुन्हे शाखेला मिळाली. त्यांनी छापा टाकत चार जणांना रंगेहाथ पकडले. मात्र, या प्रकाराची माहिती स्थानिक पोलिसांना नव्हती, हे संशयास्पद ठरत आहे.
उल्हासनगर कॅम्प नंबर ५मधील नेताजी चौक येथे साई आर्केड नावाच्या व्यावसायिक इमारतीतील दुकान क्रमांक ५३मध्ये ऑनलाइन मटक्याचा अड्डा सुरू असल्याची माहिती भिवंडी गुन्हे शाखेला मिळाली. या माहितीच्या आधारे त्यांनी कारवाई करत अड्ड्यावर छापा टाकला. या कारवाईत अड्डा चालवणारा व्यवस्थापक शंखू वंडार जाधव (२७), संगणक ऑपरेटर बरकतली शौकत अली शेख (३२); तसेच मटका खेळणारे सलमान कुतुबुद्दीन खान (२३) आणि रमेश मंगलदास भानुशाली (५४) यांना रंगेहाथ पकडले. संगणक, मोबाईल, रजिस्टर आणि रोख रक्कम आदी मुद्देमाल जप्त करण्यात आला. कारवाईत अड्ड्याचा मालक वसंत ऊर्फ अण्णा याच्याविरोधात हिललाइन पोलिस ठाण्यात गुन्हा दाखल केला आहे. पुढील तपास पोलिस उपनिरीक्षक सुर्वे करत आहेत.