पालिका पथकाला तिघांची दमदाटी

सकाळ वृत्तसेवा
ठाणे, ता. २१ : पालिकेच्या वर्तकनगर प्रभाग समितीच्या अतिक्रमण पथकाला शिवीगाळ तसेच पथकामधील दोघांना किरकोळ दुखापत झाली होती. याप्रकरणी कामात अडथळा आणल्याप्रकरणी तिघांविरोधात चितळसर पोलिस ठाण्यात गुन्हा दाखल करण्यात आला आहे.
वर्तकनगर प्रभाग समिती अतिक्रमण विभाग बुधवारी (ता. १९) दुपारी अडीचच्या सुमारास वसंतविहार येथील म्हाडा कॉलनीत वरिष्ठांच्या आदेशाने बीट निरीक्षक विशाल आरेकर, कार्यालयीन अधीक्षक अनिल पाटील, बीट निरीक्षक संतोष गायकर, शिपाई प्रमोद चौधरी यांच्यासोबत बालाजी ट्रान्सपोर्टचे चौघे बांधकामांवर कारवाई करण्याकरिता येथे गेले होते. त्या वेळी पथकाला बने स्कूलसमोर विटांची कच्ची भिंत बांधलेली दिसली. वरिष्ठांनी दिलेल्या आदेशानुसार हे बांधकाम पाडण्यात आले. याच दरम्यान अनिल पाटील, विशाल आरेकर, चौधरी शिवीगाळ करून पालिका पथकाला धमकी दिली. तसेच एका कामगाराला मारहाण केली. तसेच एकाला लाकडी दांडका हातात घेऊन धमकावले होते. याप्रकरणी चितळसर पोलिस ठाण्यात गुन्हा दाखल करण्यात आला आहे.