नामांकित रुग्णालयातून आंतररूग्णाचे सव्वा पाच लाखांचे दागिने चोरले

रुग्णालयातून रुग्णाचे सव्वापाच लाखांचे दागिने चोरीला
वर्तकनगर पोलिस ठाण्यात गुन्हा दाखल
सकाळ वृत्तसेवा
ठाणे, ता. २१ : पोटात त्रास होत असल्याने ठाण्यातील एका नामांकित खासगी रुग्णालयात उपचारार्थ दाखल झालेल्या जीन्स गारमेंट व्यावसायिकाच्या पत्नीचे सव्वा पाच लाखांचे सोन्याचे दागिने चोरीला गेले आहेत. हा प्रकार शुक्रवारी (ता. २०) समोर आल्यावर याप्रकरणी वर्तकनगर पोलिस ठाण्यात गुन्हा दाखल झाला आहे.
गारमेंट व्यावसायिकाच्या पत्नीच्या पोटात त्रास झाल्याने तिला मंगळवारी (ता. १७) उपचाराकरिता ठाण्यातील एका नामांकित खासगी रुग्णालयात दाखल केले होते. बुधवारी (ता. १८) सकाळी ११ वाजताच्या सुमारास पत्नीला एमआरआयसाठी डॉक्टरांनी अंगावर असलेले सोन्याचे दागिने व इतर वस्तू काढून ठेवण्यास सांगितले. यानुसार त्यांनी अंगावरील दागिने पर्समध्ये ठेवले आणि ती रुग्णालयाच्या कपाटात ठेवली. शुक्रवारी (ता. २०) फिर्यादीच्या पत्नीने मुलीला पर्समध्ये ठेवलेले दागिने पाहण्यास सांगितले. त्या वेळी सोन्याचे दागिने आढळून आले नाहीत. त्यामुळे त्यांनी दागिन्यांची शोधाशोध केली व रुग्णालयाच्या कर्मचाऱ्यांकडे विचारणा केली; परंतु ते दागिने आढळून न आल्याने अज्ञाताविरोधात वर्तकनगर पोलिस ठाण्यात गुन्हा दाखल केला आहे.
त्यामध्ये दोन लाखांची चार तोळ्याची चेन, दोन लाखांच्या चार ग्रॅमच्या चार अंगठ्या, एक लाखाचे दोन तोळ्याचे ब्रेसलेट आणि २५ हजारांचे सहा ग्रॅम वजनाचे लॉकेट असे पाच लाख २५ हजारांचे दागिने चोरीला गेल्याचे तक्रारीत नमूद करण्यात आले आहे. याप्रकरणी पुढील तपास वर्तकनगर पोलिस करीत आहेत.