अपघात

कार-दुचाकीच्या धडकेत पती-पत्‍नी ठार
नेरळ-कळंब मार्गावर अपघात

कर्जत, ता. २१ (वार्ताहर) ः तालुक्यातील वरई येथील रस्‍त्‍यावर ओव्हरटेक करण्याच्या नादात शुक्रवारी (ता. २०) दुपारी भीषण अपघात घडला. यात दुचाकीवरील वृद्ध दाम्पत्याचा जागीच मृत्यू झाला.
प्राथमिक माहितीनुसार, भरधाव कारने डंपरला ओव्हरटेक करताना समोरून येणाऱ्या स्कुटीला जोरदार धडक दिली. धडक इतकी जबरदस्त होती, की स्कुटीवरील दोघे रस्त्यालगतच्या शेतात फेकले गेल्‍याने दोघेही गंभीर जखमी झाले. स्थानिक नागरिकांनी तत्काळ मदत करत दोघांना धामोते येथील रुग्णालयात दाखल केले; मात्र डॉक्टरांनी तपासणीअंती दोघांनाही मृत झाल्याचे घोषित केले. अपघातात विनोद वल्लरेत नारायण रामकृष्ण पिल्ले आणि त्यांच्या पत्नी सुषमा विनोद पिल्ले असून, दोघेही स्थानिक रहिवासी होते.
अपघात करणारा कारचालक संस्कार मुकेश अंजने (२४, रा. मध्य प्रदेश) याला नेरळ पोलिसांनी तत्‍काळ ताब्यात घेऊन चौकशी सुरू केली आहे. अपघाताचा तपास नेरळ पोलिस ठाण्याचे प्रभारी अधिकारी शिवाजी ढवळे करीत आहेत. अपघातामुळे दोन्ही वाहनांचे मोठे नुकसान झाले आहे.

...............

ट्रेलरचालकाची कारला धडक
खालापूर, ता. २१ (वार्ताहर) ः मुंबई-पुणे राष्ट्रीय महामार्गावर खोपोली बाह्य मार्गावर मद्यधुंद ट्रेलरचालकाने कारला फरपटत नेल्याने कारचा चक्काचूर झाला. इतका भीषण अपघात होऊनही शुभम केशव चव्हाण (३०), योगेश गुरव (३८) आणि रोहित कुडाळकर (३०, रा. पुणे) हे आश्चर्यकारकरीत्या बचावले आहेत. शुक्रवारी संध्याकाळी तिघे जण कारने पुण्याहून खोपोलीकडे जात असताना मिळठाकूर वाडीजवळ हा अपघात झाला.
भरधाव आलेला ट्रेलर अनियंत्रित होऊन कारवर धडकला. कारला फरपटत नेत लगतच्या डोंगरभागावर कंटेनर आदळला. दरम्यान, वाहतूक पोलिसांनी कारमध्ये अडकलेल्‍या योगेश, रोहित आणि शुभमला बाहेर काढले. तिघे जखमी झाले असून त्‍यांना तातडीने उपचारासाठी खोपोली नगरपालिका रुग्णालयात पाठवण्यात आले. पोलिसांनी ट्रेलरचालक बिपीन रमेश चौबे (३४, रा. उत्तर प्रदेश) याला ताब्यात घेतले असून त्याने मद्यधुंद अवस्‍थेत वाहन चालवल्‍याचे प्राथमिक तपासणीत उघड झाले आहे.