आयटीआय प्रवेशासाठी २६ जूनची मुदत

वाणगाव, ता. २१ (बातमीदार) : सध्याच्या स्पर्धेच्या युगात झटपट नोकरी, उद्योग, व्यवसाय किंवा नोकरी मिळवणे अत्यंत गरजेचे झाले आहे. या पार्श्वभूमीवर पालघर जिल्ह्यातील औद्योगिक प्रशिक्षण संस्था (आयटीआय)मध्ये प्रवेश प्रक्रिया १५ मेपासून ऑनलाइन पद्धतीने सुरू झाली आहे. २६ जूनपर्यंत प्रवेश घेण्याची अंतिम मुदत आहे. इच्छुक उमेदवारांनी मुदतीपूर्व अर्ज करावा, असे आवाहन जिल्हा व्यवसाय शिक्षण व प्रशिक्षण अधिकारी महेशकुमार सिडाम यांनी केले आहे. पालघर जिल्ह्यातील शासकीय आयटीआयमध्ये एकूण १,८७८ जागा, तर खासगी आयटीआयमध्ये ५१२ जागा प्रशिक्षणासाठी उपलब्ध आहेत. प्रवेशासाठी https://admission.dvet.gov.in या संकेतस्थळावर अर्ज करणे आवश्यक आहे. प्रवेश प्रक्रियेची संपूर्ण माहिती पुस्तिका संकेतस्थळावर उपलब्ध असून उमेदवारांनी जवळच्या औद्योगिक प्रशिक्षण संस्थेत जाऊन अर्ज निश्चित करणे व नंतर विकल्प भरणे बंधनकारक आहे. सरकारमार्फत पात्र उमेदवारांना प्रति महिना ५०० रुपये वाढीव विद्यावेतनही दिले जाते.