व्यायामशाळेसाठीच्या अनधिकृ बांधकामावर होणार कारवाई

व्यायामशाळेसाठीच्या अनधिकृत बांधकामावर होणार कारवाई
घाटकोपर, ता. २२ (बातमीदार) ः पवई येथील एका पार्किंगमध्ये सुरू असलेल्या ‘गोल्ड जिम’ या व्यायामशाळेवर एका महिन्यात कारवाई केली जाणार आहे. येथील अनधिकृत बांधकाम हटवण्याबाबत संबंधितांना एक महिन्याच्या मुदतीची नोटीस देण्यात आली आहे, अशी माहिती पालिकेच्या भांडुप एस विभागातील अधिकाऱ्यांनी दिली आहे.
पवईच्या हिरानंदानी वसाहतीतील सुप्रीम बिझनेस पार्क या इमारतीच्या पार्किंग क्षेत्रात सुरू असलेल्या गोल्ड जिमवर बेकायदा बांधकाम केल्याचा आरोप असलेली तक्रार पालिकेकडे करण्यात आली आहे. त्यामुळे पालिकेच्या इमारत व कारभार विभागाने कारवाईचा बडगा उगारला आहे. व्यायामशाळेला एक महिन्याची नोटीस बजावून सर्व अनधिकृत बांधकाम हटवण्याचे आदेश देण्यात दिले आहेत. महापालिकेच्या सक्षम प्राधिकरणाची कोणतीही पूर्वपरवानगी घेण्यात आलेली नाही, असे निरीक्षणात आल्याचे अधिकाऱ्यांनी स्पष्ट केले आहे. कारवाईचा खर्च मालकांकडून वसूल केला जाईल, असा इशारा देण्यात आला आहे.
सर्व बाबी तपासून कारवाई केली जाईल, अशी प्रतिक्रिया एस विभागाचे अधिकारी अमोल थोरात यांनी दिली.