डोंबिवलीत रानभाज्या महोत्सव

डोंबिवलीत रानभाज्या महोत्सव

डोंबिवली, ता. २२ (बातमीदार) ः सुभेदार वाडा कट्टा व कल्याण विकास फाउंडेशनच्या संयुक्त विद्यमाने रानभाज्यांच्या विक्रीसाठी महोत्सव आयोजित करण्यात आला होता. सलग सात ते आठ वर्षे हे प्रदर्शन भरवण्यात येत आहे. या प्रदर्शनाला मुरबाड तालुक्यातील ग्रामीण भागातील महिलांनी रानभाज्या विक्रीसाठी आणल्या होत्या. सुमारे २० ते २५ प्रकारच्या रानभाज्या या प्रदर्शनास विक्रीसाठी होत्या. या भाज्या जून महिन्यातच मिळतात.

काही महिलांनी रानभाज्या आणि भाकरी बनवून आणल्या होत्या, जेणेकरून भाज्यांची चव कळावी. तसेच या रानभाज्या आरोग्यवर्धक असल्याने ग्राहकांनी मोठ्या संख्येने खरेदीसाठी गर्दी केली होती. या वेळी रानभाज्या कोणत्या प्रकारच्या आहेत, रानभाज्या बनवण्याची पद्धत याविषयीसुद्धा माहिती ग्राहकांना देण्यात आली. याचबरोबर महिलांनी घरगुती मध, तेल, मोहरच्या फुलांनी बनवलेले लाडू, टोपल्या अशा अनेक प्रकारच्या बनवलेल्या वस्तू विक्रीसाठी आणल्या होत्या. या प्रदर्शनाला खूप मोठ्या प्रमाणात ग्राहकांची उपस्थिती होती. दरवर्षी रानभाज्या प्रदर्शन व विक्री हा कार्यक्रम सुभेदार कट्टा यांच्या संयुक्त विद्यमाने भरवण्यात येतो. जंगलातील पौष्टिक भाज्या, अन्न ज्याच्यावर अनेक समूह जगत आहेत, याची माहिती शहरातील बांधवांना माहिती व्हावी, हा उद्देश आहे, असे हिंदवी तुळपुळे यांनी सांगितले.