वृक्ष छाटणीसाठी शुल्क बंद करावे

तुर्भे, ता. २२ (बातमीदार) : नवी मुंबई महापालिकेकडून सोसायटीच्या आवारातील धोकादायक वृक्षाच्या फांद्यांची छाटणी करण्यासाठी शुल्क आकारले जाते. हे शुल्क बंद करण्याची मागणी समता सहकार्य सामाजिक संस्थेकडून करण्यात आली आहे.
अटी व शर्तींच्या अधीन राहून संस्थेच्या आवारातील वृक्षांच्या छाटणीची परवानगी दिली जाते. सोसायटीच्या आवारातील वृक्षांची छाटणी सोसायटीमार्फत करणे अनिवार्य आहे. ‘झाडे लावा, झाडे जगवा’ असे आवाहन प्रशासनाकडून वारंवार करण्यात येते. त्यानुसार सोसायट्यांमध्ये झाडांची लागवड केली जात असून त्यांचे जतन व निगा राखली जात आहे. प्रत्येक करदात्यांकडून मालमत्ता करामध्ये वृक्ष उपकर आकारला जातो; मात्र प्रत्येक झाडाच्या फांद्या कापण्यासाठी प्रत्येकी २०० रुपये आकारणी का केली जात आहे, असा प्रश्न समता सहकार्य संस्थेकडून उपस्थित केला जात आहे. पावसाळ्यात झाडे पडून आर्थिक अथवा जीवितहानी होऊ नये, यासाठी उद्यान विभागाकडून वारंवार पत्रक काढले जाते व ती झाडे तोडण्याची जबाबदारीसुद्धा त्या त्या संस्थेवर टाकली जाते. असे असताना झाडांच्या छाटणीसाठी कर घेतल्यामुळे महापालिकेने छाटणी करणे गरजेचे असतानादेखील उलट छाटणीची परवानगी देण्याच्या नावाखाली जनतेची लूटमार केली जात असल्याचा आरोप संस्थेचे अध्यक्ष ॲड. चंद्रकांत निकम यांनी केला आहे. त्यामुळे झाडे छाटणीच्या परवानगीसाठी आकारलेले शुल्क बंद करण्यात यावे, अन्यथा परिसरातील सर्व सोसायटी/संस्थामधून याबाबत आंदोलन छेडण्यात येईल, असा इशारा देण्यात आला आहे.