कामोठ्यातील नालेसफाईच्या दिरंगाईबाबत पालिकेकडे तक्रार

कामोठ्यातील नालेसफाईच्या दिरंगाईबाबत पालिकेकडे तक्रार
कामोठे, ता. २५ (बातमीदार) : कामोठे येथील नालेसफाई न झाल्याने ठेकेदाराची चौकशी करून कारवाई करण्याची मागणी माजी नगरसेवक डॉ. अरुणकुमार भगत यांनी महापालिकेकडे केली आहे. तर महापालिका प्रशासनाने ठेकेदारावर कारवाईच्या दिशेने पावले उचलली असल्याचे सांगण्यात येत आहे.
कामोठे प्रभागामध्ये विविध ठिकाणी नाले भरून वाहू लागले आहेत. सध्या पावसाळ्याचे दिवस असून मॉन्सूनपूर्व नालेसफाई होणे आवश्यक होती; मात्र नालेसफाई करणाऱ्या ठेकेदारांकडून काही विभागात सफाईच्या कामाकडे दुर्लक्ष करण्यात आले आहे. ठेकेदाराला वारंवार संबंधित परिसरातील स्वच्छता निरीक्षक यांनी नालेसफाईबाबत सूचना देऊनसुद्धा त्याकडे कानाडोळा करण्यात येत आहे. ठेकेदाराकडे पुरेसे मनुष्यबळ, यंत्रसामग्री उपलब्ध नसल्याने कामात दिरंगाई होत असल्याचे डॉ. भगत यांनी महापालिकेला दिलेल्या निवेदनात म्‍हटले आहे. ठेकेदाराची कामोठे शहरामध्ये नालेसफाई न केल्याबाबत पूर्ण चौकशी करावी व त्याच्यावर नियमानुसार कारवाई करण्याच्या मागणीचे निवेदन डॉ. भगत यांनी महापालिकेला दिले आहे. यानंतर महापालिकेने ठेकेदारावर कारवाईचा बडगा उगारून नालेसफाईच्या कामाला गती दिली आहे. तर नालेसफाईच्या कामात दिरंगाई करणाऱ्या ठेकेदारावर महापालिकेने कारवाई प्रस्तावित केली आहे. दुसऱ्या प्रभागातील कंत्राटदाराकडून कामोठे विभागातील काम पूर्ण करण्यात येणार असल्याची माहिती उपायुक्त डॉ. वैभव विधाते यांनी दिली आहे.