चिंचघर येथील इनोवेटर्स फसाड कंपनीचे बेसुमार अनधिकृत बांधकाम
चिंचघर येथील ‘इनोव्हेटर्स फसाड’चे बांधकाम अनधिकृत
कंपनीवर कारवाई करण्याची ग्रामपंचायतीची जिल्हाधिकाऱ्यांकडे मागणी
वाडा, ता. २५ (बातमीदार) : तालुक्यातील चिंचघर गावातील मे. इनोव्हेटर्स फसाड कंपनीने शासनाचे नियम धाब्यावर बसवून हजारो चौरस मीटरचे अनधिकृत बांधकाम केले आहे. या बांधकामाला दिलेल्या नोटिसांना कंपनीने केराची टोपली दाखविली असून, ग्रामपंचायतीचा लाखो रुपयांचा कर थकविला आहे. या बांधकामावर कायदेशीर कारवाई करण्याची मागणी ग्रामपंचायतीने आता जिल्हाधिकाऱ्यांकडे केली आहे.
तालुक्यातील चिंचघर ग्रामपंचायत कार्यक्षेत्रात इनोव्हेटर्स फसाड ही बांधकामाशी संबंधित साहित्य बनविणारी कंपनी आहे. कंपनीने आपल्या मालकीच्या भूखंड क्रमांक ४२९, ४०४/२/ब, ४०३/१ या जागेवर बांधकाम करताना कायद्याचे उल्लंघन केले आहे. कंपनीच्या मालकीच्या १५ हजार ७४६ चौरस मीटर जागेवर चार हजार १२८ चौरस मीटर प्रस्तावित बांधकामाची सनद तहसीलदारांकडून घेतली आहे; परंतु मालकीच्या जागेत बांधकाम करताना कंपनीने सुमारे १४ हजार चौरस मीटर वाढीव काम केले आहे. या बांधकामाला कोणत्याही खात्याची मंजुरी तसेच स्थानिक ग्रामपंचायतीची परवानगी घेतलेली नाही.
या वाढीव बांधकामाबाबत चिंचघर ग्रामपंचायतीने कंपनी प्रशासनाला वारंवार लेखी सूचना देऊनही कोणत्याही परवानग्या सादर केल्या नाहीत. त्यामुळे ग्रामपंचायतीने हे वाढीव बांधकाम अनधिकृत घोषित करून सुमारे ३१ लाख ४२ हजार रुपयांचे कर आकारणी बिल, मागणीचा हुकूमनामा व जप्तीचे बिल बजावले आहे; परंतु कंपनीने यापैकी एकही रुपयाचा कर भरणा ग्रामपंचायतीला केलेला नाही.
चौकशी होणार
याबाबत चिंचघर ग्रामपंचायतीचे उपसरपंच मनेश पाटील यांनी सांगितले, की कंपनी प्रशासनाच्या या मुजोरपणाबद्दल ग्रामपंचायतीने मागील वर्षीच तहसीलदार व गटविकास अधिकारी यांना माहिती दिली होती; परंतु त्यांच्याकडून कोणतीही कारवाई न झाल्याने ग्रामपंचायतीने आता जिल्हाधिकारी व नगररचना कार्यालय यांच्याकडे तक्रार करून कंपनीच्या अनधिकृत बांधकामावर कारवाई करण्याची मागणी केली आहे. यासंदर्भात कंपनीचे व्यवस्थापक अंजित झा यांच्याशी संपर्क साधला असता त्यांनी प्रतिक्रिया देण्यास नकार दिला. दरम्यान, मंडळ अधिकाऱ्यांकडून चौकशी करून तपासण्यात येईल, असे तहसीलदार भाऊसाहेब अंधारे यांनी म्हटले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.