पाच लाख ८९ हजारांची घरफोडी

नवी मुंबई, ता. २३ (वार्ताहर) : अज्ञात चोरट्याने वाशीतील जुहू गावात बंद घर फोडून घरातील रोख रकमेसह वेगवेगळ्या प्रकारचे दागिने असा तब्बल पाच लाख ८९ हजारांचा ऐवज चोरून नेल्याची घटना घडली आहे. वाशी पोलिसांनी याप्रकरणी घरफोडीचा गुन्हा दाखल करून तपासाला सुरुवात केली आहे.
तक्रारदार महेंद्र रोकडे (३७) हे वाशीतील जुहू गावात प्राची सदन इमारतीत कुटुंबासह राहण्यास आहे. २० जूनला सकाळी १० वाजता महेंद्र व त्याचा भाऊ आपल्या कामावर निघून गेले होते. त्यानंतर दुपारी त्यांची बहीणदेखील कामानिमित्त बाहेर गेली होती. यादरम्यान त्यांचे घर बंद असल्याची संधी साधून चोरांनी त्यांच्या घराचा कडी-कोयंडा उचकटून त्यांच्या घरात प्रवेश केला. त्यानंतर चोरांनी महेंद्र रोकडे याच्या घरातील एक लाख ८० हजारांची रोख रक्कम तसेच वेगवेगळ्या प्रकारचे दागिने असा तब्बल पाच लाख ८९ हजारांचा ऐवज चोरून नेला. दरम्यान, रात्री ९.३० वाजण्याच्या सुमारास महेंद्रची बहीण घरी आली असता, तिला घराचे कुलूप तोडल्याचे निदर्शनास आले. घरातील कपाटात असलेली रोख रक्कम व दागिने चोरून नेल्याचे निदर्शनास आले. त्यानंतर त्यांनी वाशी पोलिस ठाण्यात तक्रार दाखल केली. त्यानुसार वाशी पोलिसांनी अज्ञात चोराविरोधात घरफोडीचा गुन्हा दाखल करून तपासाला सुरुवात केली आहे.