मोबाईल चोरीच्या गुन्ह्यांत वाढ

नवी मुंबई, ता. २३ (वार्ताहर) : वाशी परिसरामध्ये मोबाईल फोन स्नॅचिंगच्या गुन्ह्यात वाढ होऊ लागली असून, लुटारूंनी मागील दोन दिवसांत दोन व्यक्तींचे महागडे मोबाईल फोन खेचून पलायन केल्याच्या घटना घडल्या आहेत. वाशी पोलिसांनी या दोन्ही घटनांची नोंद करून लुटारूंचा शोध सुरू केला आहे.
वाशी सेक्टर-२ मध्ये घडलेल्या घटनेत एपीएमसी मॅफ्को मार्केटजवळ राहणारे संजय कांबळी (५८) हे रविवारी (ता. २२) दुपारी वाशीमध्ये कामानिमित्त गेले होते. त्यानंतर ते दुपारी सव्वातीन वाजण्याच्या सुमारास एपीएमसी येथे जाणारी बस पकडण्यासाठी वाशी सेक्टर-२ येथील बस स्टॉपवर उभे होते. याच वेळी त्यांच्यासमोर आलेल्या एका रिक्षामध्ये पाठीमागे बसलेल्या लुटारूने संजय कांबळी यांच्या हातातील १० हजारांचा मोबाईल फोन खेचून वाशीच्या दिशेने पळ काढला. संजय कांबळी यांनी त्या रिक्षाचा पाठलाग केला; मात्र रिक्षाचालक व त्याचा साथीदार दोघे रिक्षातून पळून गेले. त्यानंतर कांबळी यांनी वाशी पोलिस ठाण्यात तक्रार दाखल केली.
-------------------
सव्वा लाखाचा मोबाईल लंपास
सानपाडा सेक्टर-५ मध्ये राहणारे मनोज पाटील (४४) शुक्रवारी (ता. २०) वाशी सेक्टर-२९ मधील एका डॉक्टरकडे उपचार घेण्यासाठी आले होते. त्यानंतर रात्री ९.३० वाजण्याच्या सुमारास ते रस्त्यावर आपल्या कारजवळ उभे राहून मोबाईल फोनवरील मेसेज पाहत असताना, दुचाकीवरून आलेल्या दोघा लुटारूंपैकी पाठीमागे बसलेल्या एकाने मनोज पाटील यांच्या हातातील एक लाख १० हजार रुपयांचा मोबाईल फोन हिसकावून पळ काढला. पाटील यांनी त्यांचा पाठलाग करण्याचा प्रयत्न केला; मात्र ते दुचाकीवरून पळून गेले. त्यानंतर त्यांनी वाशी पोलिस ठाण्यात तक्रार दाखल केली.