रेल्वेस्थानकाच्या प्रवेशद्वारावर फेरीवाल्यांचा कब्जा
खारघर, ता. २३ (बातमीदार) : खारघर रेल्वेस्थानकावर फेरीवाल्यांचा सुळसुळाट झाला असून, स्थानकाच्या प्रवेशद्वार असलेल्या मोकळ्या जागेत रेडिमेड कपडे, खेळणी, मोबाईल कव्हर, भेळ आणि फळविक्रेत्यांनी अनधिकृतपणे व्यवसाय थाटला आहे. रेल्वेस्थानकावर कार्यरत असलेले रेल्वे पोलिस, लोहमार्ग पोलिस, महाराष्ट्र सुरक्षा रक्षक आणि सिडकोचे सुरक्षा रक्षक केवळ बघ्याची भूमिका घेत असल्यामुळे प्रवाशांमध्ये नाराजी पसरली आहे.
खारघर रेल्वेस्थानकांवरून दैनंदिन जवळपास सव्वा लाख प्रवासी प्रवास करतात. त्यामुळे स्थानकाच्या मुख्य प्रवेशद्वारावर प्रवाशांची मोठी गर्दी असते. या गर्दीतून वाट काढत प्रवाशांना जावे लागत आहे. त्यातच खारघर रेल्वेस्थानकाच्या प्रवेशद्वारावर फेरीवाल्यांनी कब्जा केला आहे. सात वर्षांपूर्वी मुंबईतील एल्फिन्स्टन आणि परेल स्थानकावर जोडणाऱ्या पुलावर झालेल्या चेंगराचेंगरीत काही प्रवाशांचा मृत्यू झाला होता. त्या वेळी स्थानक परिसरात १५० मीटर परिक्षेत्रात फेरीवाल्यांना मुंबई उच्च न्यायालयाने मज्जाव केला होता. असे असतानादेखील रेल्वे आणि आरपीएफकडून फेरीवाल्यांकडे दुर्लक्ष केले जात आहे. स्थानकांच्या प्रवेश मार्गावर फेरीवाल्यांनी कब्जा करून व्यवसाय करीत आहेत. एवढेच नव्हे तर दिव्यांग व्यक्तीला स्थानकांवर प्रवेश करता यावे यासाठी तयार करण्यात आलेल्या मार्गावर फेरीवाल्यांनी कब्जा केल्याचे दिसून आले. वाढत्या फेरीवाल्यांमुळे स्थानकात प्रवेश करताना आणि बाहेर पडताना प्रवाशांना अडचण होत असूनही रेल्वे पोलिस आणि सिडकोचे सुरक्षा रक्षक केवळ बघ्याची भूमिका घेत असल्यामुळे प्रवाशांमध्ये नाराजी पसरली आहे. या संदर्भात पनवेल रेल्वे पोलिस ठाण्यात संपर्क केला असता, दूरध्वनी बंद असल्याचे समजले. खारघर रेल्वेस्थानकावर कार्यरत असलेल्या सुरक्षा रक्षकांना सूचना देऊन फेरीवाले हटविले जातील, असे सिडकोचे मुख्य सुरक्षा अधिकारी किसन गायकवाड यांनी सांगितले.
------------------
अधिकाऱ्यांच्या ओळखीचा फायदा
खारघर रेल्वेस्थानक परिसरात अनधिकृतपणे व्यवसाय करणाऱ्या फेरीवाल्यांकडे विचारणा केली असता, रेल्वेकडून दोन-तीन महिन्यांत एक वेळा कारवाई केली जाते. त्या वेळी आकारलेला दंड भरून पुन्हा व्यवसाय जैसे थे सुरू असतो. त्यात काही अधिकारी ओळखीचे असल्यामुळे व्यवसाय करण्यासाठी कोणतीही अडचण निर्माण होत नाही, असे सांगितले.
------------------
पोलिस बळ दिल्यास कारवाई करू!
लोहमार्ग पोलिसांकडे विचारणा केली असता, देशात बेरोजगारीचे प्रमाण वाढत आहे. काही लोक व्यवसाय करून कुटुंबाचा उदरनिर्वाह करीत आहेत. रेल्वेस्थानकाच्या प्रवेशद्वारावर व्यवसाय करणाऱ्या फेरीवाल्यांवर सिडकोने कारवाई करणे अपेक्षित असल्याचे त्यांनी सांगितले. सिडकोकडून नेमणूक करण्यात आलेल्या सुरक्षा रक्षकांकडे विचारणा केली असता, लेखी आदेश आणि पोलिस बळ दिल्यास कारवाई करू, असे सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.