नवीन महामार्गावर खड्ड्यांचे साम्राज्य

नवीन महामार्गावर खड्ड्यांचे साम्राज्य
कासा, ता. २४ (बातमीदार) : मुंबई-अहमदाबाद राष्ट्रीय महामार्गावर सिमेंट काँक्रीटीकरणाचे काम अपूर्ण आहे. तसेच निकृष्ट दर्जा आणि अकार्यक्षम नियोजनामुळे महामार्ग धोकादायक ठरत आहे. पहिल्याच पावसात रस्त्यावर खड्डे पडले असून, येथील अपघातांची वाढती संख्या पाहता या महामार्गावरील प्रवास मृत्यूला आमंत्रण देण्यासारखा आहे, अशी संतप्त प्रतिक्रिया वाहनचालक देत आहेत.

ठाण्यातील घोडबंदरपासून गुजरातच्या सीमेपर्यंत सिमेंट काँक्रीटीकरणाचे काम सुमारे ९८ टक्के पूर्ण झाल्याचे सांगण्यात येते, मात्र प्रत्यक्षात अनेक ठिकाणी रस्त्याच्या जोडण्या, चढ-उतार, लेव्हलिंगमध्ये गोंधळ, तसेच मोठाले खड्डे हे समस्यांचे मुख्य कारण ठरत आहेत. विशेषतः मनोर, सोमटा ते मेंढवण आणि तवा, महालक्ष्मी परिसरात खड्ड्यांचे जाळेच तयार झाले आहे. त्यामुळे वाहनधारकांना अक्षरशः जीव मुठीत धरून प्रवास करावा लागत आहे. चार दिवसांपूर्वी पडलेल्या मुसळधार पावसात महामार्गावरील महालक्ष्मी उड्डाणपुलावर गुडघाभर पाणी साचले होते. यामुळे अनेक वाहनांचे अपघात झाले, तर अनेक उड्डाणपुलाखाली पाणी साचून वाहतूक कोंडी झाली. यात सोमटा, चिंचपाडा, तवा, घोळ, महालक्ष्मी, चारोटी या उड्डाणपुलाखाली पाणी साचले होते.

महामार्गावर सध्या दररोज अपघात होत आहेत. अनेक वाहने खड्ड्यांमुळे नादुरुस्त होत आहेत. काही ठिकाणी मोठ्या अपघातात प्रवाशांच्या जीवाला धोका निर्माण झाला आहे. यामुळे महामार्गावरून प्रवास टाळण्याचा पर्याय काही प्रवासी निवडू लागले आहेत. विशेष म्हणजे जुना डांबरी रस्ता अपघातप्रवण ठरत होता म्हणून सिमेंट काँक्रीटीकरणाचा नवा मार्ग बनवण्यात आला, पण पहिल्याच पावसात या रस्त्यांचीही अवस्था बिकट झाली आहे. ठेकेदारांकडून फक्त रेती टाकून खड्डे बुजवण्याचा केविलवाणा प्रयत्न केला जात असून, त्यामुळे धोका अजून वाढतो आहे.

चारोटी टोल परिसरात कोंडी
सातीवली येथील अपूर्ण उड्डाणपूल आणि खराब सेवा रस्त्यांमुळे गेल्या काही दिवसांपासून मोठ्या प्रमाणात वाहतूक कोंडी होत आहे. तसेच चारोटी टोलनाक्याच्या पुढे घोळ परिसरात पुलावर मोठाले खड्डे पडले असून, त्या ठिकाणी दररोज अपघात घडत आहेत.

सध्या सिमेंट काँक्रीटचा जो महामार्ग सुरू आहे, तो महामार्ग प्राधिकरणाच्या निष्काळजीचे फलित आहे. ठेकेदारांचे नियोजन शून्य आहे. नवीन रस्त्यावरसुद्धा खड्ड्यांचे जाळे तयार झाले आहे.
-हरबन्स सिंग नन्नाडे, अध्यक्ष, महाराष्ट्र वाहन चालक-मालक संघटना

सध्या अनेक ठिकाणी सिमेंट काँक्रीट रस्त्यांवर खड्डे पडले आहेत. ठेकेदारास खड्डे तत्काळ बुजवण्यास सांगण्यात आले आहे. वाहनचालकांना त्रास होऊ नये, यासाठी विविध उपाययोजना करण्याचा आम्ही प्रयत्न करत आहोत.
-सुहास चिटणीस, प्रबंधक, महामार्ग प्राधिकरण