पंढरीच्या वारीसाठी ‘एफडीए’ची विशेष मोहीम

पंढरीच्या वारीसाठी ‘एफडीए’ची विशेष मोहीम
मिठाईची तपासणी, गैरप्रकार होऊ नये म्हणून आयुक्तांची सूचना

सकाळ वृत्तसेवा
मुंबई, ता. २४ : येत्या ६ जुलैला असणाऱ्या आषाढी एकादशीनिमित्त अनेक संतांच्या पालख्या पंढरपूरच्या दिशेने मार्गस्थ होणार आहेत. या दरम्यान सर्वाधिक मागणी ही मिठाई आणि प्रसादाला असते. ही मागणी पूर्ण करण्यासाठी अनेकदा दुकानदार भेसळ करतात. शिवाय मिठाई किंवा खव्याचे पेढे आठवडाभर तरी टिकावे, यासाठी त्यामध्ये भेसळयुक्त पदार्थ घातले जातात. पण दुकानदारांनी असे करू नये आणि भेसळयुक्त पदार्थांची विक्री होऊ नये, यासाठी एफडीए प्रशासनाने विशेष मोहीम हाती घेतली आहे.

आळंदी आणि देहू ही वारीची प्रमुख ठिकाणे आहेत. त्या मार्गावरील जी मुक्कामाची स्थळे आहेत तेथे काही संस्थांकडून अन्नदान केले जाते, भंडारे आयोजित केले जातात. त्या ठिकाणी स्वच्छता किंवा अन्नाची सुरक्षितता आहे की नाही, हे तपासले जाणार आहे. पुणे विभागाचे अन्न सुरक्षा अधिकारी ही तपासणी करतील. शिवाय यावर्षी वारी तिथे पोहोचण्यापूर्वी त्या मार्गावर असणारी हॉटेल्स, रेस्टॉरंट यासह पंढरपूर आणि इतर परिसरातील हॉटेल्स, विशेषत: मिठाईची दुकाने तपासली जातील.
-------------------------------------
सुरक्षेसाठी मोहीम
मिठाई, खाद्यपदार्थ अनेक भक्त प्रसाद म्हणून घरी घेऊन जातात आणि या वारीच्या कालावधीत अन्नावाटे कोणतीही अपरिचित घटना घडू नये, त्याची काळजी घेण्यासाठी सूचना सर्व अन्न सुरक्षा अधिकाऱ्यांना दिल्या आहेत. ही मोहीम सुरू झाली असून, सोलापूर विभागातील अन्न सुरक्षा अधिकारी ही मोहीम राबवत असल्याचे एफडीएचे आयुक्त राजेश नार्वेकर यांनी सांगितले.
-------------------------------
मिठाई खराब होण्याची शक्यता
या सर्व मोहिमेसाठी पुरेसे मनुष्यबळही देण्यात आले आहे. खव्याची मिठाई लवकर खराब होण्याची शक्यता असते. त्यामुळे ही मिठाई तपासणी करण्याच्या सूचना देण्यात आल्या आहेत. वारीत सहभागी होणाऱ्या भक्तांनी ही मिठाई, खवा, पेढे खरेदी करताना विशेष काळजी घेतली पाहिजे, असे अन्न व औषध प्रशासन आयुक्त राजेश नार्वेकर यांनी सांगितले.