शरद पवार गट ठाण्यात सक्रिय

सकाळ वृत्तसेवा
ठाणे, ता. २४ ः राष्ट्रवादी शरद पवार गटाचे विधिमंडळ गटनेते डॉ. जितेंद्र आव्हाड यांच्या उपस्थितीत शहरातील एमएआयएम काँग्रेस आणि विविध सामाजिक क्षेत्रात सक्रिय असलेल्या कार्यकर्त्यांनी पक्ष प्रवेश केला आहे. त्यामुळे पक्षाला लागलेली गळती थांबवण्यापेक्षा नवीन नेते आणि कार्यकर्ते घडवण्याच्या दृष्टीने राष्ट्रवादी शरद पवार गट ठाण्यात सक्रिय झाला आहे.
राष्ट्रवादी शरद पवार गटाचे आमदार डॉ. जितेंद्र आव्हाड यांचा गड असलेल्या कळवा येथील माजी नगरसेवकांनी रामराम ठोकत शिवसेना शिंदे गटात प्रवेश केला. आव्हाडांसाठीचा हा सर्वात मोठा धक्का मानला जात होता. अशातच आगामी पालिका निवडणुकीची तयारी सुरू करताना ठाण्यात राष्ट्रवादी शरद पवार गट मजबूत करण्याच्या दृष्टीने रणनीती आखली जात असून, पक्षाने कार्यकर्त्यांची नवीन फळी उभारण्यास सुरुवात केली आहे. त्यानुसार सोमवारी पक्ष कार्यालयात कार्यकर्त्यांचा पक्षप्रवेश पार पडला. या वेळी नेतृत्वाच्या धर्मनिरपेक्ष विचारधारेवर विश्वास ठेवून हा पक्षप्रवेश केल्याचे कार्यकर्त्यांनी सांगितले. या वेळी खासदार बाळा म्हात्रे, शहराध्यक्ष सुहास देसाई, कार्याध्यक्ष प्रकाश पाटील, महिलाध्यक्ष सुजाता घाग, कळवा-मुंब्रा विधानसभाध्यक्ष शमीम खान उपस्थित होते.
----------------------------
हा संघर्षाचा काळ
सध्या पक्षाच्या संघर्षाचा काळ आहे. या काळातही शमीम खान आणि मुफ्ती अशरफ यांच्या पुढाकारातून शेकडो कार्यकर्ते पक्षात आले आहेत. पक्षात आलेले हे कार्यकर्ते धर्मनिरपेक्ष विचारधारेवर चालणारे आहेत. सध्याच्या अस्थिर वातावरणातही राष्ट्रवादी काँग्रेस-शरदचंद्र पवार पक्षच न्याय करू शकतो, यावर लोकांचा विश्वास असल्याचे डॉ. जितेंद्र आव्हाड या वेळी म्हणाले.
----------------------------------------
शिंदे गटाला चिमटा
शिवसेना शिंदे गटात इच्छुकांची भरमार झाली आहे. सर्वांनाच उमेदवारीचे आश्वासन दिले जात आहे. जणू काही २६० नगरसेवक ते सभागृहात नेणार आहेत, असा चिमटा या वेळी आमदार डॉ. जितेंद्र आव्हाड यांनी काढला.