सिडकोची ऐतिहासिक सोडत

द्रोणागिरी नोडमधील लाभार्थ्यांसाठी ऐतिहासिक सोडत
३१९ लाभार्थ्यांना १२.५% योजनेअंतर्गत देय भूखंडाच्या इरादापत्राचे वाटप
सकाळ वृत्तसेवा
नवी मुंबई, ता. २४ : सिडकोच्या १२.५% योजनेअंतर्गत द्रोणागिरी नोडमधील ३१९ पात्र लाभार्थ्यांना उपमुख्यमंत्री एकनाथ शिंदे यांच्या उपस्थितीत आज इरादापत्रांचे वाटप करण्यात आले.
सिडकोतर्फे या भूखंडांसाठी सोडत घेण्याचा ऐतिहासिक निर्णय ११ जून २०२५ रोजी संचालक मंडळाच्या बैठकीत घेण्यात आला. तर द्रोणागिरी नोडमधील प्रकल्पबाधितांसाठी शेवटची सोडत २००७ मध्ये घेण्यात आली होती.
रायगड जिल्ह्यातील उरण तालुक्यातील द्रोणागिरी नोडमधील ३१९ पात्र लाभार्थ्यांना मुख्यमंत्री देवेंद्र फडणवीस यांनी इरादापत्रे देण्याचा ऐतिहासिक निर्णय घेतला. त्यानंतर मंत्रालयातील दालनात उपमुख्यमंत्री एकनाथ शिंदे यांच्या हस्ते या लाभार्थ्यांना प्रतिनिधिक स्वरूपात इरादापत्रांचे वाटप करण्यात आले.
ठाणे, नवी मुंबई, पनवेल आणि उरण तालुक्यातील ९५ गावांतील जमिनी संपादित करताना त्यांना १२.५ टक्के योजनेअंतर्गत भूखंड वाटप करण्याचा निर्णय घेण्यात आला होता.
या वेळी सिडकोचे उपाध्यक्ष तथा व्यवस्थापकीय संचालक, विजय सिंघल, उपमुख्यमंत्री
कार्यालयाचे अप्पर मुख्य सचिव नवीन सोना, सह-व्यवस्थापकीय संचालक, गणेश देशमुख, सिडको, मुख्य भूमी व भूमापन अधिकारी, सिडको, संदीप निचित आणि मुख्य भूमी व भूमापन अधिकारी, सिडको, दीपक आकडे आणि पात्र लाभार्थी उपस्थित होते.

१ लाख ९० हजार चौरस मीटर भूखंड क्षेत्राचे वाटप करण्याचे निश्चित
या योजनेअंतर्गत ९४ टक्के लाभार्थ्यांना भूखंडांचे वितरण पूर्ण झाले होते. तर उर्वरित ५.५९ टक्के भूखंडाचे वाटप शिल्लक होते. त्यामुळे या नोडमधील ३१९ पात्र लाभार्थ्यांना १२.५ टक्के भूखंड वाटप करण्याचा निर्णय मुख्यमंत्री फडणवीस यांनी घेतला. त्यानुसार या पात्र लाभार्थ्यांना १ लाख ९० हजार चौरस मीटर भूखंड क्षेत्राचे वाटप करण्याचे निश्चित करण्यात आले आहे. या ३१९ पैकी २४ पात्र लाभार्थ्यांना एकनाथ शिंदे यांच्या हस्ते प्रातिनिधिक स्वरूपात इरादापत्रांचे वाटप करण्यात आले.