शाळेत जाण्यासाठी चिखलाची वाट

शाळेत जाण्यासाठी चिखलाची वाट

टिटवाळा, ता. २५ (वार्ताहर) : कल्याण-डोंबिवली महापालिकेने सात सेमी इंग्रजी शाळा सुरू करण्याची मोठी घोषणा केली आहे. या शाळांमध्ये गणित, विज्ञानासारखे विषय इंग्रजीत शिकवले जाणार आहेत. प्रवेश प्रक्रियाही पारदर्शक आणि सोपी ठेवल्याचा दावा प्रशासनाने केला आहे. विद्यार्थ्यांसाठी मोफत वह्या, पुस्तके गणवेश, बूट व इतर साहित्य उपलब्ध करून दिल्याची माहिती महापालिकेच्या आयुक्तांनी दिली आहे; मात्र दुसरीकडे टिटवाळा येथील ठाकूर पाड्यासारख्या भागांतील विद्यार्थ्यांना शाळेत जाण्यासाठी चिखल-माती तुडवावी लागत आहे. स्मार्ट सिटीच्या नावाखाली हजारो कोटींचा खर्च केला जात आहे; तर दुसरी विद्यार्थ्यांना अजूनही दलदलीतून वाट काढावी लागत आहे.

शाळेत जाण्यासाठी रस्ता नसल्याने विद्यार्थ्यांची गैरसोय होत आहे. विद्यार्थ्यांना दररोज जीव मुठीत धरून शाळेत जावं लागतं. सांडपाणी, चिखलातून पाय घसरून पडण्याची भीती असते; मात्र विद्यार्थी या सगळ्या अडथळ्यांचा सामना करत ते शिक्षण घेण्याचा प्रयत्न करत आहेत. या पार्श्वभूमीवर ‘स्मार्ट सिटी’चा गाजावाजा म्हणजे केवळ कागदावरचा स्वप्ननगरीचा खेळ वाटतो.

“इंग्रजी शाळा हव्यात, पण आधी विद्यार्थ्यांसाठी रस्ता तरी द्या”, असा संतप्त सवाल आता पालक करत आहेत. “मुलाला इंग्रजी शाळेत शिक्षण द्यावे” हे स्वप्न मध्यमवर्गीय आणि गरीब पालकांच्या मनात असते. त्यात आता महापालिकेने इंग्रजी माध्यमाच्या ‘स्मार्ट’ शाळा सुरू करत असल्याचा डंका वाजवला, पण दुसरीकडे, हेच विद्यार्थी शाळेत पोहोचण्यासाठी चिखल, दलदल आणि धोकादायक वाटा पार करत आहेत.