दंड वाचवण्यासाठी खासगी शाळेची गाडी सुसाट

अंबरनाथ, ता. २५ (वार्ताहर) : अंबरनाथमध्ये सोमवारी वाहतूक विभागाने शालेय खासगी बस व्हॅन व रिक्षा यातून होणाऱ्या अवैध वाहतुकीवर धडक कारवाई केली. या कारवाईदरम्यान एका व्हॅनचालकाने हजार पाचशेचा दंड आणि कारवाईतून वाचण्यासाठी विरुद्ध दिशेने येणाऱ्या एका रिक्षाला जोरदार धडक दिली. या रिक्षामध्ये असणारे प्रवासीच नाही, तर व्हॅनमधील अनेक विद्यार्थीही जखमी झाले. याचा एक व्हिडिओ समाज माध्यमांवर व्हायरल होत असून, दंड वाचवण्यासाठी वाहनचालकाने मुलांचा जीव धोक्यात घातल्याने नागरिक संताप व्यक्त करत आहे. तसेच, व्हॅनचालकावर गुन्हा दाखल करण्याची मागणी करत आहेत.

शहरात अनेक खासगी शाळेच्या बस, व्हॅन आणि रिक्षांमधून विद्यार्थ्यांची विनापरवानगी वाहतूक होत असल्याचे निदर्शनास आले होते. या वाहनांमध्ये मुलांना कोंबून बसवले जात होते. वाहनाच्या क्षमतेपेक्षा जास्त विद्यार्थी बसवून राजरोसपणे शहरात ही वाहतूक होत होती. अनेक वाहनांची कागदोपत्री पूर्तता नसल्याने विद्यार्थ्यांची सुरक्षितता ऐरणीवर आली होती. यासंदर्भात अनेक तक्रारी वाहतूक पोलिसांना मिळाल्या होत्या. तक्रारीच्या अनुषंगाने शहरात वाहतूक पोलिसांनी कारवाईचा बडगा उगारला होता. सोमवारी ही कारवाई सुरू असतानाच पश्चिमेच्या फातिमा शाळेजवळ एका व्हॅनचालकाने दंड आणि कारवाईपासून वाचण्यासाठी विरुद्ध दिशेने भरधाव वेगाने व्हॅन चालवून एका रिक्षाला धडक दिली. यावेळी रिक्षातील एक महिला प्रवासीला जबर मार लागला. तर तिच्यासोबत असलेली दोन लहान मुले थोडक्यात बचावली. व्हॅनमध्ये असलेले अनेक विद्यार्थी जखमी झाल्याचे समोर येत आहे. याचा व्हिडिओ सध्या समाज माध्यमावर व्हायरल होत असून, नागरिक प्रचंड संताप व्यक्त करत आहेत. विद्यार्थ्यांचा जीव धोक्यात घालणाऱ्या अशा वाहनचालकांवर फक्त दंडच नाही, तर पोलिसांनी गुन्हा दाखल करावा, अशी मागणी होत आहे.