डाय मेकर्स हबची मागणी शासनाकडून मान्य

पालघर बनणार डाय मेकर्स हब
सामाजिक कार्यकर्ते नितीन म्हात्रे यांची मागणी शासनाकडून मान्य
विरार, ता. २५ (बातमीदार) ः पालघर जिल्ह्यातील डाय मेकर्ससाठी स्वतंत्र हब निर्माण करण्यात यावा, या मागणीसाठी वसईतील सामाजिक कार्यकर्ते तथा डी फॅक्टरीचे डायरेक्टर नितीन म्हात्रे यांनी केलेल्या पाठपुराव्याला यश आले आहे. पालघर दौऱ्यात मुख्यमंत्री देवेंद्र फडवणीस यांनी जिल्ह्यात डाय मेकर्स हब उभारण्याची घोषणा केली आहे. या हबसाठी लागणारी आवश्यक ती सर्व मदत करण्यास तयार असल्याची तयारी म्हात्रे यांच्या डी फॅक्टरी कंपनीने दर्शविली आहे.
पालघर जिल्ह्यातील भूमिपुत्रांचा डाय मेकिंग हा पारंपरिक आणि महत्त्वपूर्ण औद्योगिक प्रक्रिया असलेला व्यवसाय आहे. धातूच्या, प्लास्टिकच्या किंवा इतर सामग्रीच्या वस्तूंच्या उत्पादनासाठी आवश्यक असलेली साच्यांची निर्मिती करण्याची प्रक्रिया डाय मेकिंगमध्ये केली जाते. डायच्या मदतीने यंत्रांचे पार्ट, ऑटोमोबाइल्स भाग, प्लॅस्टिकची उपकरणे, इलेक्ट्रॉनिक गॅजेटचे भाग, खेळणी तयार केली जातात.
पालघर जिल्ह्यात मोठ्या प्रमाणावर लघू आणि मध्यम उद्योग आहेत. ते विविध उत्पादनांसाठी डायचा वापर करतात. यामुळे लाखो लोकांना रोजगार मिळतो. कोट्यवधी रुपयांची उलाढाल करणाऱ्या या उद्योगासाठी स्वतंत्र औद्योगिक वसाहत असणे आवश्यक आहे; जेणेकरून देश-विदेशातील डाय खरेदी करणाऱ्यांना एकाच ठिकाणी खरेदी करता येईल. यासाठी शासनाने पाठबळ देऊन डाय मेकर्ससाठी स्वतंत्र हब तयार करावा, अशी मागणी वसईतील सामाजिक कार्यकर्ते नितीन म्हात्रे यांनी केली होती. त्यासाठी ते शासन दरबारी पाठपुरावा करीत होते. म्हात्रे यांच्या या मागणीला मुख्यमंत्री कार्यालयाकडून सकारात्मक प्रतिसाद मिळाला असून, हा प्रश्न उद्योगमंत्री कार्यालयाकडे वर्ग केला होता. त्यासंदर्भातील माहिती ई-मेलद्वारे कळविण्यात आली होती.

प्राथमिक तयारी पूर्ण
डाय मेकर्स उद्योग हब उभारण्यासंदर्भातील सर्व प्राथमिक तयारी शासनाने पूर्ण केली आहे. मागील आठवड्यात पालघर दौऱ्यावर आले असताना मुख्यमंत्र्यांनी जिल्ह्यात डाय मेकर हब उभारण्याची घोषणा केली. याबद्दल नितीन म्हात्रे यांनी समाधान व्यक्त केले आहे. डाय मेकर्स हबसाठी लागणाऱ्या सर्व प्रकारच्या मदतीसाठी डी फॅक्टरी कंपनी तांत्रिक सल्लागार म्हणून सहकार्य करण्यास तयार असल्याचे म्हात्रे यांनी सांगितले. शासनाने नुकतीच वाढवण परिसराचे क्षेत्रफळ वाढवून चौथी मुंबई तयार करण्याचे जाहीर केले आहे. त्याचादेखील फायदा या डाय मेकर्स हबला होणार असल्याचे नितीन म्हात्रे यांनी सांगितले.