वाहतूक कोंडी सोडवण्याबाबत नियोजन

अलिबाग, ता. २५ (वार्ताहर) ः शहरातील व्यापारी व इतर राजकीय व सामाजिक कार्यकर्त्यांनी शहरात असणाऱ्या विविध समस्या सोडविण्यासाठी पुढाकार घेतला आहे. यासंदर्भात जिल्हा वाहतूक शाखा पोलिस निरीक्षक सोमनाथ लांडे व नगर परिषद प्रशासनाची नुकतीच संयुक्त बैठक घेण्यात आली. या वेळी विविध विषयांवर चर्चा करण्यात आली.
अलिबाग शहरात वाढलेली लोकसंख्या, पर्यटकांच्या वाहनांमुळे पार्किंग व वाहतूक कोंडीची समस्या दिवसेंदिवस वाढत आहे. त्यामुळे शहरात सम-विषम पार्किंग करणे, नो पार्किंगची ठिकाणे ठरवण्यात आली असून, शक्य त्या ठिकाणी पे अँड पार्क सुविधा सुरू करण्याबाबत या वेळी चर्चा करण्यात आली.
शहरात येणाऱ्या अवजड वाहनांमुळे कोंडीत भर पडत आहे. त्‍यामुळे मालवाहतूक गाड्यांच्या वेळा ठरवणे, शहरात चौकाचौकात लावण्यात आलेले बॅनर्स नगरपालिकेच्या वतीने काढणे, जेएसडब्ल्यू कंपनीसह मांडवा येथून प्रवासी वाहतूक करणाऱ्या बसच्या थांब्यांचे नियोजन करणे, हॉकर्स पॉइंट ठरवणे अशा महत्त्वाच्या विषयांवर व्यापाऱ्यांकडून सूचना देण्यात आल्या.

नागरिकांच्या सुरक्षेसाठी उपाययोजना
ज्वेलर्स व बाजारपेठेतील दुकानांनी एकत्रित येत रात्रीच्या वेळी सुरक्षा रक्षक नेमणे, शहरात बसवण्यात आलेल्या सीसीटीव्ही कॅमेऱ्यांपैकी काही कॅमेरे बंद आहेत. ते नगरपालिकेच्या वतीने त्वरित दुरुस्‍ती करून घेणे तसेच कॅमेराच्या मदतीने वाहतूक नियमांचे उल्लंघन करणाऱ्यांविरोधात कारवाई करण्यावर या वेळी चर्चा करण्यात आली.

पोलिस मदतीसाठी जनजागृतीचे आवाहन
आर्थिक फसवणूक झाल्यास १९३० या क्रमांकावर तत्काळ संपर्क करून रक्कम फ्रिज करण्याबाबत जनजागृती करावी तसेच एखादी दुर्घटना घडल्यास ११२ क्रमांकावर तातडीने संपर्क साधण्याबाबत सूचना करण्यात आली.