आषाढीसाठी पनवेल आगारातून १२ गाड्यांचे नियोजन

नवीन पनवेल, ता. २५ (बातमीदार) : आषाढी एकादशीनिमित्त विठूरायाच्या दर्शनासाठी पंढरपूरला जाणाऱ्या भाविकांची संख्या मोठी असते. वारीत पायी जाणे ज्यांना शक्य नसते. त्यांच्या सोयीसाठी एसटी महामंडळाने विशेष जादा गाड्यांची व्यवस्था केली आहे. आतापर्यंत तीन बसचे बुकिंग झाले आहे. पनवेल आगारातून १२ गाड्यांचे नियोजन ठरले आहे; मात्र भाविकांच्या मागणीनुसार बससेवा उपलब्ध करून दिली जाईल, अशी माहिती पनवेल बसस्थानक प्रमुख डी. के. म्हात्रे यांनी दिली.
दरवर्षी पनवेलमधून हजारो भाविक विठूरायाचे दर्शन घेण्यासाठी पंढरपूरला जात असतात. अनेक जण खासगी वाहनाने; तर काही जण सार्वजनिक वाहनाने पंढरपूर गाठत असतात. खासगी वाहनातून जाणे अनेकदा खर्चिक असते. त्यामुळे भाविकांची गैरसोय टाळण्यासाठी दरवर्षी राज्य परिवहन महामंडळाकडून पंढरपूरला जाण्यासाठी जादा बसगाड्यांचे नियोजन केले जाते. यावर्षी मुंबई विभागातून ५५; तर रायगडच्या २५ बसची मदत होणार आहे. पनवेललगत ज्या गावातील भाविक ४२ पेक्षा जास्त असतील, अशा भाविकांची मागणी आली, तर त्याच गावातून थेट पंढरपूरसाठी बससेवा उपलब्ध करून दिली जाणार आहे.