बापलेकांना लाकडी बांबूने मारहाण

बापलेकांना लाकडी बांबूने मारहाण
मुलाच्या हाताला गंभीर दुखापत; चुलत भावाविरोधात गुन्हा दाखल
सकाळ वृत्तसेवा
ठाणे, ता. २५ : मालकीच्या जागेवर पार्किंग नियोजन करण्यासाठी गेलेल्या बापलेकांना मारहाण झाल्याचा प्रकार दिव्यात समोर आला आहे. या मारहाणीत मुलाच्या हाताला गंभीर दुखापत झाली आहे. याप्रकरणी तक्रारदाराच्याच चुलत भावाविरोधात गुन्हा दाखल झाल्याची माहिती मुंब्रा पोलिसांनी दिली.

दिवा पूर्व येथील दातिवली गावात राहणारे आणि भारतीय रेल्वेत टेक्निशियन पदावर कार्यरत असलेले गिरीश पाटील यांची सर्व्हे क्रमांक ८६/३ दिवा, गणेशनगर म्हात्रे गेट येथे २२ गुंठे मालकीची जागा आहे. या जागेवर कोणी अतिक्रमण करू नये, यासाठी ती जागा खासगी पार्किंगसाठी ते वापरत आहेत. रविवारी (ता. २२) दुपारी एकच्या सुमारास त्यांचा मुलगा दक्ष हा त्या जागेवर पार्किंगचे नियोजन करण्यासाठी गेला होता. त्या वेळी पाटील यांचा चुलत भाऊ देवेश पाटील याने दक्षला शिवीगाळ करीत दमदाटी केली. झालेला प्रकार दक्ष याने वडिलांना फोनवरून सांगितला. याचदरम्यान त्या ठिकाणी आलेल्या तक्रारदारांसमोर देवेश हा पडलेला लाकडी बांबू उचलून दक्ष याला मारू लागला, तसेच दक्षला वाचण्यासाठी गेलेल्या गिरीश यांनाही देवेशने मारहाण केली. याचदरम्यान तक्रारदारांनी हातातून लाकडी बांबू हिसकावून दूर फेकून दिल्यानंतर देवेश याने दगड उचलून तक्रारदारांच्या दिशेने फेकून मारला. त्यानंतर देवेश याने जवळ असलेला मोठा दगड उचलून दक्ष याच्या अंगावर धावून गेला. तेव्हाही तक्रारदारांनी तो दगड हिसकावून घेतला. दरम्यान, बांबूने झालेल्या मारहाणीत ते बापलेक जखमी झाले आहेत. तसेच या मारहाणीत दक्ष याच्या डाव्या हाताला फ्रॅक्चर झाल्याचे तक्रारीत नमूद करण्यात आले आहे. याप्रकरणी देवेश पाटील याच्याविरोधात गुन्हा दाखल केल्याची माहिती मुंब्रा पोलिसांनी दिली.