आरोपींना मुंब्रा पोलिसांनी केली अटक,

सेवानिवृत्त महिलेच्या घरात चोरी
दोन आरोपींना अटक
कळवा, ता. २५ (बातमीदार) : मुंब्रा येथे एका सेवानिवृत्त महिलेच्या बंद घराचे कुलूप तोडून कपाटातून लाखो रुपये चोरणाऱ्या दोन आरोपींना मुंब्रा पोलिसांनी सोमवरी (ता. २३) अटक केली. या वेळी १४ लाख ३७ हजार, दोन दुचाकी व मोबाईल पोलिसांनी आरोपींकडून हस्तगत केले आहे.
जुबेदा खान (वय ६०) या एका शाळेत चतुर्थ कर्मचारी म्हणून काम करीत होत्या. दोन महिन्यापूर्वी सेवानिवृत्त झाल्याने त्यांना मिळालेल्या पैशांतून घर बांधण्याच्या विचाराने जुबेद यांनी मे महिन्यात साडेपंधरा लाख रुपये आपल्या घरातील कपाटात ठेवले आणि घराला कुलूप लावून लग्नासाठी मूळ गावी गेल्या. हीच संधी साधून जुबेदा यांच्याच इमारतीतील जावेद सलीम शेख (वय २८) व आपताब मोमीन (वय २४) यांनी घरात शिरून हे पैसे चोरले. जुबेदा गावावरून परत येताच कपाटातील पैसे चोरीस गेल्याचे लक्षात आले. त्यांनी तातडीने मुंब्रा पोलिसांत धाव घेत चोरीची तक्रार नोंदविली. यासंदर्भात मुंब्रा पोलिस ठाण्याचे वरिष्ठ पोलिस निरीक्षक अनिल शिंदे यांच्या मार्गदर्शनाखाली गुन्हे पोलिस उपनिरीक्षक सावंत यांनी व त्यांच्या पथकाने सीसीटीव्ही फुटेजद्वारे तपास सुरू केला. याद्वारे त्यांनी जावेद व आपताब यांना ताब्यात घेऊन चौकशी केली असता, त्यांनी गुन्हा कबूल केला.