कर्मचाऱ्यांची सेवा पुस्तके डिजिटल

कर्मचाऱ्यांची सेवा पुस्तके डिजिटल
सेवा विषयक लाभ देण्यास सुलभता
सकाळ वृत्तसेवा
ठाणे, ता. २५ : शासकीय सेवेत कार्यरत असलेल्या कर्मचाऱ्यांना त्यांच्या सेवा जेष्ठतेनुसार लाभ मिळत असतो. त्यात अनेकदा सेवा पुस्तकांचे अद्यावातीकरण केले नसल्यामुळे अथवा गहाळ झाल्याच्या तक्रारी वाढत असल्यामुळे अधिकारी व कर्मचाऱ्यांना सेवाविषयक बाबींचा लाभ देण्यात अडथळा येत असतो. त्यामुळे ठाणे झेडपीने कर्मचाऱ्यांच्या सेवा पुस्तकांचे डिजिटललायाझेशन करण्यात येत असून आतापर्यंत एक हजार १८० सेवा पुस्तके डिजिटल करण्यात आली. त्यामुळे आता एका क्लिकवर या कर्मचाऱ्यांची माहिती उपलब्ध होणार आहे.
ठाणे जिल्हा परिषदेत १७ विभागासह पाच पंचायत समितीमध्ये कार्यरत असलेल्या अधिकारी व कर्मचाऱ्यांना विविध सेवा विषयक योजनांचा लाभ देण्यात येत असतो. या सेवा पुस्तकात सेवा विषयक ८१ बाबींचा समावेश आहे. त्यासाठी त्या अधिकारी आणि कर्मचाऱ्यांचे सेवा पुस्तके अद्यावत असणे गरजेचे आहे. अशातच ठाणे जिल्हा परिषदेतील मुख्यालयात १७ विभागात ३०४ कर्मचारी असून पाच पंचायत समितीत ८८० कर्मचारी कार्यरत आहेत. या अधिकारी व कर्मचाऱ्यांना सेवाविषयक बाबींचा लाभ देताना सेवा पुस्तिका अद्यावयत न केल्यामुळे अनेक अडचणी निर्माण होत असतात. या अडचणी सोडविण्यासाठी ठाणे जिल्हा परिषद प्रशासनाने कर्मचारी ऑनलाईन एकात्मिक प्रणाली सुरु केली. या प्रणालीच्या म्ध्यमातून जिल्हा परिषदेच्या कर्मचाऱ्यांची माहिती डिजिटलायझेशन केल्यामुळे कामास गती प्राप्त होणार आहे. ई-सेवा पुस्तिकामुळे प्रत्येक कर्मचाऱ्याची वैयक्तिक माहिती सुरक्षितपणे जतन करणे, वार्षिक गोपनीय अहवालांचे मूल्यमापन आणि जतन करणे, तसेच पदोन्नती, बदली, रजा आणि प्रशिक्षण नोंदी तत्काळ अपडेट होणे, यांमुळे कागदविरहित कामकाज सुलभ होण्यास मदत होणार आहे.
कर्मचाऱ्यांची माहिती एका क्लिकवर
दरम्यान, ऑनलाईन एकात्मिक प्रणालीद्वारे ठाणे झेडपीने कर्मचाऱ्यांच्या सेवा पुस्तकांचे डिजिटलायझेशन करण्यात येत आहे. या प्रणालीद्वारे आतापर्यंत एक हजार १८० सेवा पुस्तके डिजिटल करण्यात असून या कर्मचाऱ्यांची एका क्लिकवर इत्यंभूत माहिती प्राप्त होणार आहे. तसेच अधिकारी व कर्मचाऱ्यांना सेवा विषयक बाबंचा लाभ देण्यास सुलभता येणार असल्याची माहिती उप मुख्यकार्यकारी अधिकारी अविनाश फडतरे यांनी दिली.