अलिबाग किनारी धडकल्या उधाणाच्या लाटा

अलिबाग किनारी धडकल्या उधाणाच्या लाटा
अलिबाग, ता. २५ (वार्ताहर) ः रायगड जिल्ह्यात पावसाचा जोर काहीसा ओसरला असला तरी बुधवारी दुपारी भरती सुरू होताच, उधाणाच्या महाकाय लाटा अलिबाग समुद्रकिनारी धडकल्या. या लाटा साधारण साडेचार मीटरपेक्षा अधिक असल्याचा अंदाज हवामान खात्याने वर्तवला आहे. लाटांचा मनसोक्‍त आनंद घेण्यासाठी पर्यटकांसह स्‍थानिकांनी गर्दी केली होती.
उधाणाच्या वेळी कोणताही अनुचित प्रकार घडू नये म्हणून ठिकठिकाणी पोलिस बंदोबस्त व सागरी सुरक्षा रक्षक नेमण्यात आले होते. सुरक्षा रक्षकांकडे लाइफ जॅकेट, मदतीसाठी बोट व नगरपालिकेचे कर्मचारीही सज्‍ज होते. जिल्ह्यातील समुद्रकिनाऱ्यांवर मंगळवार सायंकाळपासून धडकणाऱ्या लाटांमुळे काही ठिकाणी संरक्षक कठड्यांची मोडतोड झाली, तर काही ठिकाणी समुद्रालगत असलेल्या गावाच्या वेशीत भरतीचे पाणी शिरले.

किनारी गावांना फटका
अलिबाग तालुक्यातील धेरंड, शहापूर, रांजणखार, डावली, मिळकतखार, कोप्रोली तर पेण तालुक्यातील वाशी, वढाव, लाखोले, घोडाबंदर, तामशीबंदर, रावे, दादर, सोनखार, हमरापूर या गावांना बसला आहे. या गावात उधाणापासून बचावासाठी किंवा नागरिकांना आधार घेण्यासाठी कोणत्याही उपाययोजना न केल्‍याने बहुतांश नागरिकांना गाव सोडून इतर नातेवाइकांकडे आधार घ्यावा लागत आहे. त्यामुळे संताप व्यक्त होत आहे.

*बीचवरील फोटो समीर सरांनी पाठवला आहे.