चौकातील सीसीटीव्हीचे एक्सेस मिळेना

तांत्रिक बिघाडामुळे सीसीटीव्ही बंद
गुन्ह्यांचा शोध घेण्यास पोलिसांना अडथळा

कल्याण, ता. २५ (बातमीदार) : काही वर्षांपूर्वी महापालिकेने स्मार्ट सिटीअंतर्गत लाखो रुपये खर्च करून चौकाचौकात सीसीटीव्ही कॅमेरे बसविले आहेत; मात्र काही तांत्रिक बिघाडामुळे ठरावीक कॅमेऱ्यांचा एक्सेस मिळत नसल्याने चोरीच्या घटनांचा शोध घेण्यास पोलिसांना अडथळा ठरत आहे. चोरी, लुटमारीसारख्या गुन्ह्यांचा तपास करताना हे कॅमेरे पोलिसांचा तिसरा डोळा ठरतात; मात्र काही वेळेस तांत्रिक अडचणींमुळे चोरांना शोधण्याचे काम अडचणीचे ठरत आहे.

अनुचित प्रकार, अपघात, चोरी अशा प्रकारची घटना घडली तर तपासासाठी पोलिस यंत्रणेला चौकाचौकातील सीसीटीव्हीची मदत होते. या कॅमेऱ्यांच्या माध्यमातून पोलिसांनी आतापर्यंत अनेक गुन्हेगारांचा तसेच घडलेल्या घटनांचा यशस्वीपणे शोध घेतला आहे, परंतु आता तांत्रिक बिघाडामुळे पोलिसांना तपास करणे जिकिरीचे बनू लागले आहे. सोमवारी (ता. २३) रात्री कल्याण पूर्व गुंजाई चौकातील एक बंद पानटपरी फोडून तिच्यातील रोख रक्कम आणि काही वस्तूंची चोरी झाल्याचे मंगळवारी सकाळी निदर्शनास आले होते. याबाबत कोळसेवाडी पोलिसात तक्रार करण्यासाठी गेलेल्या तक्रारदाराने गुंजाई चौकातील महापालिकेने या चौकात लावलेल्या सीसीटीव्ही कॅमेरा तपासण्याची पोलिसांना विनंती केली होती; मात्र तांत्रिक अडचणी समोर आल्या होत्या.

कायमस्वरूपी २४ तास रहदारी असलेला पुणे लिंक रोड हा अनेक चौक आणि अंतर्गत रस्त्यांना जोडला गेलेला आहे. उल्हासनगरला जोडून श्रीराम चौकातून सुरू झालेल्या या मार्गावर चक्कीनाका या मुख्य चौकापर्यंत रेल्वेस्थानक, एसटीस्थानक, असंख्य रिक्षास्थानके, पोलिस ठाणे, रहिवासी व व्यापारी संकुले, शोरूम, छोटी मोठी दुकाने, हॉटेल्स, शाळा, हॉस्पिटल सह स्थानिक आमदारांचे जनसंपर्क कार्यालय तसेच महापालिकेचे प्रभाग क्षेत्र कार्यालयदेखील आहे. त्यामुळे हा मार्ग कल्याण पूर्वेतील अत्यंत महत्त्वाचा मानला जातो. याच मार्गावर सतत अपघात, चोरी आणि अनुचित प्रकारदेखील घडत असतात. असे असताना आता अशा प्रकारे महापालिकेचे सीसीटीव्हीचे एक्सेस जर पोलिसांना मिळत नसतील, तर या कॅमेऱ्यांचा उपयोग तरी काय, असा सवाल उपस्थित होत आहे.