डांबरीकरण केलेला रस्ता १५ दिवसात उखडला

डांबरीकरण केलेला रस्ता १५ दिवसांत उखडला
मनसेचे पालिका अभियंत्यांविरोधात अनोख्या पद्धतीन आंदोलन
नेरूळ, ता. २५ (बातमीदार) : सीवूड्स रेल्वे स्थानक ब्रिज ते सेक्टर ५०, पामबीच रोड, सावळा हॉस्पिटल ते आदर्श मार्केट इत्यादी रस्त्यांचे नुकतेच करोडो रुपये खर्च करून डांबरीकरण करण्यात आले आहे. परंतु डांबरीकरणानंतर केवळ १५ दिवसांत या रस्त्यांवर खड्डे पडले असून, खडी निघाली आहे. त्यामुळे कंत्राटदाराने निकृष्ट दर्जाचे काम केल्याचा आरोप मनसेकडून करण्यात येत आहे. त्‍याअनुषंगाने नवी मुंबई मनसेचे शहर सचिव सचिन कदम यांच्या नेतृत्वाखाली महापालिका मुख्यालयात अनोख्या पद्धतीने आंदोलन करण्यात आले. या वेळी आंदोलनकर्त्या मनसैनिकांनी कार्यकारी अभियंत्यांना विडंबनात्मक कविता आणि रस्त्यावरील खडी भेट दिली.
नुकतेच महापालिकेकडून मॉन्सूनपूर्व शहरातील रस्‍त्‍यांच्या दुरुस्‍तीची कामे पूर्ण करण्यात आली आहेत. सीवूड्समध्येदेखील रेल्‍वे स्‍थानक ब्रिज, पामबीच रोड, सावळा हॉस्‍पिटल, आदर्श मार्केट इत्यादी रस्‍त्‍यांचे डांबरीकरण करण्यात आले आहे. मात्र अवघ्या १५ दिवसांत संबंधित रस्‍ते उखडले आहेत. त्‍यामुळे निकृष्ट दर्जाच्‍या कामामुळे नाराजी व्‍यक्‍त केली जात आहे. मनसेने डांबरीकरणाचे काम केलेल्या कंत्राटदाराविरोधात याअगोदरदेखील आंदोलन केले होते. त्या वेळी कंत्राटदारावर कारवाई करण्याचे आश्वासन महापालिका अधिकाऱ्यांनी दिले होते; परंतु कंत्राटदारास पुन्हा काम देण्यात आले. परिणामी रस्त्यावर नव्याने टाकण्यात आलेले डांबर अवघ्या १५ दिवसांतच उखडले गेले असून, खडी निघाली आहे. त्यामुळे या प्रकरणात मोठ्या प्रमाणात भ्रष्टाचार झाल्याचा आरोप मनसेच्या वतीने करण्यात आला आहे. त्याअनुषंगाने निकृष्ट कामाविरोधात मनसेचे शहर सचिव सचिन कदम आणि सहकाऱ्यांनी महापालिका मुख्यालयात ठिय्या आंदोलन करून महापालिका कार्यकारी अभियंता मदन वाघचौडे यांना विडंबनात्मक कविता भेट दिली. तसेच खडीदेखील भेट देण्यात आली.