कुत्र्याला वाचविताना कार पुलावरून नाल्यात

कुत्र्याला वाचविताना कार पुलावरून नाल्यात
प्रसंगावधानामुळे चालक वाचला

नालासोपारा, ता. २५ (बातमीदार) : कुत्र्याला वाचविताना चालकाचे नियंत्रण सुटल्याने कार पुलावरून नाल्यात कोसळल्याची घटना वसई पश्चिम सनसिटी घास रोडवरील तुळजाभवानी माता मंदिराजवळ बुधवारी (ता. २५) पहाटे साडेचार वाजता घडली. कारचा चालक प्रसंगावधान राखून कारच्या काचा फोडून बाहेर आल्याने त्याचा जीव वाचला.
वसई विरार महापालिकेच्या अग्निशमन दलाच्या जवानांनी तत्काळ घटनास्थळावर पोहोचून नाल्यात पडलेली कार बाहेर काढली. यात कोणतीही जीवितहानी झाली नाही; मात्र कारचे नुकसान झाले आहे. वसई सनसिटी घास रोड हा रात्रीच्या वेळी सुनसान असतो. रस्त्यावर वाहने नसल्याने कारचालक सुसाट जात असताना अचानक समोर कुत्रा आला. त्याला वाचविताना चालकाचे नियंत्रण सुटल्याने कार बाजूच्या पुलाला धडकून थेट नाल्यात कोसळली. वाचविण्यासाठी कोणीही नसताना चालकाने धाडस करून काराच्या काचा फोडल्या आणि तो बाहेर आला. याची माहिती माणिकपूर पोलिसांना कळताच वसई विरार महापालिकेच्या अग्निशमन दलाच्या जवानांना पाचारण करून दोन तासांत कार बाहेर काढण्यात यश मिळविले.