प्राणघातक अपघातात

टेम्पोची कंटेनरला भीषण धडक
मुंबई-अहमदाबाद महामार्गावरील घटना, एकाचा मृत्यू
कासा, ता. २५ (बातमीदार) ः मुंबई-अहमदाबाद महामार्गावर टेम्पो आणि कंटेनरमध्ये भीषण अपघात झाला असून एकाचा मृत्यू तर एक जण जखमी झाला आहे. ही घटना चारोटी येथील महामार्ग पोलिस केंद्राच्या हद्दीत घडली आहे. मृताचे नाव शकील शगीर (वय ३१, रा. उत्तर प्रदेश) असे आहे. या अपघातात नील नावाचा एक जण जखमी झाला आहे.
मुंबई-अहमदाबाद महामार्गावर धुंदलवाडी पुलाजवळील नरेशवाडीसमोर मंगळवारी (ता. २४) दुपारी चार वाजण्याच्या दरम्यान भीषण अपघात झाला. शकील शगीर आयशर टेम्पोने मुंबईहून गुजरातच्या दिशेने भरधाव वेगाने जात होता. दरम्यान, लेन क्रमांक तीनवर कंटेनरला शकीलने पाठीमागून जोरदार धडक दिली. ही धडक इतकी भीषण होती, की टेम्पोची केबिन पूर्णपणे चेंदामेंदा झाली असून शकील याचा जागीच मृत्यू झाला.
अपघाताची माहिती मिळताच चारोटी महामार्ग पोलिस केंद्राचे पोलिस उपनिरीक्षक विजय पऱ्हाड आणि आठ पोलिस कर्मचारी घटनास्थळी दाखल झाले. अपघातग्रस्त टेम्पो प्रायव्हेट ब्रेकडाऊन क्रेनच्या मदतीने बाजूला करून वाहतूक सुरळीत करण्यात आली. पुढील कार्यवाही तलासरी पोलिस करीत आहेत.