कर्नाक पूल तीन दिवसानंतर खुला होणार

कर्नाक पुलाला अखेर मुहूर्त
तीन दिवसांत खुला करण्याचे पालिकेचे नियोजन
सकाळ वृत्तसेवा
मुंबई, ता. २५ ः मशीद बंदर रेल्वेस्थानकापासून काही अंतरावरील आणि पी. डिमेलो मार्गाला जोडणाऱ्या कर्नाक रेल्वे उड्डाणपुलाचे बांधकाम पूर्ण झाले आहे. मार्गरेषा, पथदिवे, रंगरंगोटी, दिशादर्शक फलकांची कामे पूर्ण झाली आहेत. त्यामुळे येत्या दोन-तीन दिवसांत हा पूल मुंबईकरांच्या सेवेत आणण्याचे नियोजन पालिकेने केले आहे. त्यामुळे या परिसरातील वाहतूक कोंडी कमी होण्यास मदत होईल, असा विश्वास पालिकेने व्यक्त केला आहे.
छत्रपती शिवाजी महाराज टर्मिनस, मशीद बंदर आणि मोहम्मद अली मार्ग परिसरातील वाहतुकीसाठी कर्नाक पूल महत्त्वाचा आहे. १२५ वर्षे जुना हा पूल धोकादायक झाल्‍याने मध्य रेल्वेने ऑगस्‍ट २०२२मध्‍ये हा पूल पाडला. त्यानंतर पालिकेने या पुलाच्या पुनर्बांधणीचे काम हाती घेतले. मध्‍य रेल्‍वेने मंजूर केलेल्‍या आराखड्यानुसार कर्नाक पुलाचे बांधकाम करण्‍यात आले. सद्य:स्थितीत सर्व कामे पूर्ण झाली असून, पूल वाहतुकीसाठी सज्ज आहे. येत्या दोन-तीन दिवसांत हा पूल सेवेत आणण्याचे नियोजन प्रशासनाने केले आहे.
---
लोहमार्गावर दोन तुळया
कर्नाक पुलाची एकूण लांबी ३२८ मीटर असून, रेल्वेच्या हद्दीत पुलाची लांबी ७० मीटर आहे. महापालिका ह‌द्दीतील पोहोच रस्‍त्‍याची एकूण लांबी २३० मीटर आहे. लोहमार्गावरील पुलाच्‍या उभारणीसाठी सिमेंट खांबावर प्रत्येकी ५५० टन वजनाचे ७० मीटर लांब, २६.५० मीटर रुंद आणि १०.८ मीटर उंचीच्‍या दोन तुळया बसवण्यात आल्या.