नेरूळ गावाच्या कमानीला शॉर्टसर्किटमुळे आग

नेरूळ, ता. २६ (बातमीदार) : महापालिकेने शहरातील मूळ गावठाणांच्या प्रवेश मार्गावर कमानी उभारल्या आहेत. अनेक ठिकाणी त्यावर विद्युत रोषणाईदेखील केली आहे. कमानी उभारून झाल्यानंतर वेळच्या वेळी त्याची देखभाल दुरुस्ती होत नसल्याने बुधवारी (ता. २५) पहाटे दोन वाजण्याच्या सुमारास नेरूळ गावातील कमानीला आग लागली. यामध्ये कमानीखाली उभ्या असलेल्या एका कारचे नुकसान झाले आहे. वेळीच अग्निशमन दलाने घटनास्थळी धाव घेऊन आग आटोक्यात आणल्याने संभाव्य दुर्घटना टळली.
कमानीवर केलेल्या विद्युत रोषणाईच्या वायरचे शॉर्टसर्किट होऊन आग लागल्याचा प्राथमिक अंदाज व्यक्त होत आहे. प्रत्यक्षदर्शी व्यक्तींनी तत्काळ आगीची माहिती अग्निशमन दलाला दिली. घटनास्थळी दाखल झालेल्या अग्निशमन दलाच्या कर्मचाऱ्यांनी वेळीच आगीवर नियंत्रण मिळवले. अन्यथा कमानीखालील इतर वाहने व लगतच्या रहिवासी इमारतींनादेखील धोका निर्माण झाला असता. कमानी नादुरुस्त अवस्थेत असल्याने त्याची डागडुजी करण्यात यावी, याबाबत पालिका अधिकाऱ्यांना अनेकदा कळवले होते, असे माजी नगरसेवक गिरीश महात्रे यांनी सांगितले. यानंतरही कमानीच्या दुरुस्तीकडे दुर्लक्ष झाल्याने अखेर बुधवारी पहाटेच्या सुमारास तिथे आगीची घटना घडल्याने त्यांनी संताप व्यक्त केला.