अपघातग्रस्त कर्मचाऱ्याचा खर्च महापालिकेने करावा

नेरूळ, ता. २६ (बातमीदार) : नवी मुंबई महापालिकेच्या समाज विकास विभागामध्ये ठोक मानधनावर काम करणारे कर्मचारी अमर सावंत यांचा बुधवारी (ता. २५) कामावर येत असताना अपघात झाला असून उपचारासाठी त्यांना अपोलो रुग्णालयात दाखल करण्यात आले आहे. अमर सावंत यांच्या घरची परिस्थिती हलाखीची असून घरात तो एकटाच कमविता आहे. या कर्मचाऱ्यावर अपघातामुळे शस्त्रक्रिया करावी लागणार असून महागड्या शस्त्रक्रियेचा खर्च त्यांच्या आवाक्याबाहेरचा आहे. भविष्यात आपली सेवा कायम होईल या आशेने अमर सावंत गेली काही वर्षे प्रशासनात प्रामाणिकपणे काम करत आहेत. अमर सावंत कामावर येताना अपघात झाला असल्याने त्याच्या उपचाराचा खर्च पालिका प्रशासनाने करणे आवश्यक आहे. आयुक्तांनी पालिका प्रशासनातील संबंधितांना तातडीने निर्देश देण्याची मागणी रवींद्र सावंत यांनी महापालिका प्रशासनाकडे केली आहे.